Оҕо инфекционнай балыыһатын үлэтин туһунан

Ааптар: 
Бөлөххө киир:

Оҕо  инфекционнай клиническэй балыыһатын кылаабынай бырааһа Владимир Богдашин санаатын үллэһиннэ:

— Оҕо инфекционнай клиническэй балыыһата – Дьокуускай куоракка суһал уонна уталытыллыбат сыстыганнаах ыарыылаах оҕолорго мэдиссиинэ көмөтүн оҥорор сытар балыыһалара. Стационарга ОРЗ, пневмония, оһоҕос инфекцияларын, гепатит вирустарын уонна да атын сыстыганнаах ыарыылартан анал эмтэниини ааһаллар.

Билиҥҥитэ балыыһаҕа 5 салаа үлэлиир: 74 куойкалаах салгынынан бэриллэр инфекциялар салаалара (итинтэн 37 изолятор эрэсииминэн үлэлиир); бактериальнай-диагностикалыыр салаа 54 куойкалаах, ону тэҥэ, 15 изолятор; приемнай-консультациялыыр салаа, ковид салаата 20 куойкалаах, реанимация уонна интенсивнай терапия салаата 6 куойкалаах. Быраастар бары “сыстыганнаах ыарыылар” уонна “педиатрия” хайысхатыгар (профиль) сэртипикээттээх исписэлиистэр, онтон сиэстэрэлэр — “педиатрия сиэстэрэтэ” хайысхаҕа.

Суукканы эргиччи суһал, уталытыллыбат уонна сүбэлиир көмөнү Дьокуускай куорат, Курашов уулуссатын 91/3 нүөмэрдээх аадырыһыгар оҥоробут. Ыарыһахтар, поликлиникалар, суһал көмө ыстаансыйа үлэһиттэрин ыйыытынан, бэйэлэрэ (самообращение) кэлэллэр, ону тэҥэ, өрөспүүбүлүкэ улуустарыттан санитарнай авиация аҕалар.

COVID-19 тарҕаныытын кэмигэр стационарга кэккэ хааччахтары киллэрбиппит: оҕолор уонна ыарыһаҕы көрөөччүлэр киирбит күннэригэр коронавируһу чинчийиини ааһаллар уонна түмүгэ биллиэр диэри изолятор-палааталарга сыталлар, кыаллар кыахтаах эмтээһин улахан аҥаара палааталарга оҥоһуллар, ыарыһахтар салаа (отделение) иһигэр, о.д.а. сирдэргэ кэлиилэрэ-барыылара хааччахтанар.

Ыам ыйын 9 күнүнээҕи туругунан, балыыһаҕа 85 оҕо эмтэнэ сытарыттан, 15 оҕо коронавирустаах. Реанимация уонна интенсивнай терапия салаатыгар 5 оҕо сытар, итинтэн Сovid-19 диагностаах — 2

Балыыһа мэдиссиинэ ирдэнэр тэрилинэн барытынан хааччыллан турар, эмп-том тохтобула суох толору кэлэр.

Бүгүҥҥү күҥҥэ 245 куойка миэстэлээх Өрөспүүбүлүкэтээҕи инфекционнай клиническэй балыыһаны бырайыактааһын үлэтэ бүтэн эрэр, онно  оҕолорго аналлаах 5 сыстыганнаах ыарыы салаата көрүллэр.

Дьокуускай куорат уонна өрөспүүбүлүкэ олохтоохторо официальнай иһитиннэриини эрэ итэҕэйэргэ уонна куйаар ситиминэн, социальнай ситимнэринэн, мессенджердэринэн тарҕанар ким ыыппыта биллибэт (анонимнай) иһитиннэриилэринэн сирдэтиммэккитигэр көрдөһөбүт.

Коронавирус ыарыытын кэмигэр, ол иннинээҕи кэмҥэ холоотоххо, Оҕо сыстыганнаах ыарыытын балыыһатыгар эмтэммит оҕо ахсаана 3 %-нан эбилиннэ.

Бүгүн биһиги балыыһабыт, атыттары сэргэ, уһулуччу бэлэмнэнии эрэсииминэн үлэлиир, хас биирдии ыарыһах доруобуйатын туһугар кыһаллабыт.

Оҕо инфекционнай клиническэй балыыһатын үлэтигэр сыһыаннаах бары боппуруоска “суһал линия” төлөпүөнүн 89245998077 нүөмэринэн билсиэххитин сөп.

СӨ Доруобуйатын харыстабылын министиэристибэтин пресс-сулууспата.

+1
0
+1
0
+1
0
+1
0
+1
0
+1
0
+1
0