«Оҕо барыта талааннаах төрүүр. Онон кинини улаатан истэҕин аайы кэмигэр өйүөххэ эрэ наада», — диэн Оҕо I Өрөспүүбүлүкэтээҕи норуодунай бириэмийэтин туттарар дьоро түгэҥҥэ бэлиэтээтэ “Кэскил” Оҕо бэчээтин кыһатын салайааччыта Анжелика Андреева.
edersaas.ru
“Маннык оҕону көҕүлүүр тэрээһин туох санааттан саҕыллыбытай?” – диэн ыйыппыппар “Кэскил” Оҕо бэчээтин кыһатын салайааччыта Анжелика Андреева:
— Оҕону кытта үлэлиир дьон бу сайдыылаах үйэҕэ кинилэр иннилэринэ хардыылаан, кахтарын өйөөн, саҥаттан саҥа кирбиигэ таһааран иһиэхтээхпит. Ол инниттэн дойду таһымнаах тэрээһиннэргэ кыттыыны ылабыт. Быйыл саас кулун тутарга «Кэскил» Оҕо бэчээтин кыһатын дириэкиэктэрин солбуйааччы Сардаана Сыромятникова “Пионерская правда” Оҕо бэчээтин кыһатыгар сылдьан кэлэн, бэрт үгүс сонун сүүрээннэри тобулан кэлбитэ. Бары эйгэни хабан ситиһиилээх оҕолору бэлиэтии көрөн, норуот анал бириэмийэтин олохтооһун – Сардаана Николаевна биир сүрүн бырайыага. Тэрээһин саамай сүмэтэ – талааннаах оҕону интернет нөҥүө дьон бэйэтэ куоластаан талара, — диэн кэпсээтэ.
Норуот бириэмийэтин оҥорорго санаммыт бырайыак ааптара Сардаана Сыромятникова:
— Ситиһиилээх оҕо үксүгэр хаһыакка, араадьыйаҕа уонна телевидениеҕэ биирдэ көстөөт, иһиллээт, дьон болҕомтотуттан сүтэн хаалара баар суол. Ол иһин оҕо сайдар дьоҕурун салгыы сайыннарар, ситиһиитин бар дьоҥҥо иһитиннэрэр уонна биллэрэр анал бириэмийэ баар буолуохтаах диэн уруккуттан иитиэхтии илдьэ сылдьыбыт санаабын олоххо киллэрдим. Биллэн турар, ааттыын да “Норуот бириэмийэтэ” дэнэр бырайыагы эрдэттэн бары иһитиннэрэр-биллэрэр эйгэ нөҥүө сиһилии билиһиннэрбиппит. “Кэскил 14.ру” Оҕо бэчээтин кыһатын иһинэн үлэлиир сайпытыгар сиһилии быһааран баран, биир нэдиэлэлээх аһаҕас онлайн-куоластааһыны ыыппыппыт. Үөрүөхпүт иннигэр, бириэмийэҕэ мэктиэлэммит талааннаах оҕо ахсаана олус элбэх этэ. Ол курдук, бириэмийэҕэ кыттарга 162 сайаапка киирбититтэн 60 оҕону талан, куоластааһыҥҥа киллэрбиппит. Ситиһиилээх оҕону эйгэлэринэн арааран талларбыппыт. Холобура, култуура, үөрэхтээһин, суруналыыстыка, спорт курдук араас хайысхаҕа номинацияларынан араарбыппыт. Хас биирдии министиэристибэ бэйэтин салаатынан анал бириис олохтообута.
Бастакы тэрээһиммит олус табылынна диэн санааҕа кэллибит. Мантан инньэ бу бириэмийэни сыл аайы туттарар буолуохпут.
Б.дь. бэс ыйын 21-28 күннэригэр KESKIL14.ru. сайтка ыытыллыбыт куоластааһын (кыайыылаахтары талыыга 25 омук сириттэн тиийэ куоластаабыттар!) түмүгүнэн «Көрөөччү биһирэбилэ», «Сыл лиидэрэ», «Эдэр учуонай», » Сыл спортсмена», «Эдэр суруналыыс», «Саамай айымньылаах оҕо», «Эдэр айтишник» диэн номинацияларынан кыайыылаахтар билиннилэр. Кинилэр кимнээҕий?
«Эдэр айтишник» номинация — Нина Алексеева. Программаны оҥорууга кэккэ ситиһиилэрин иһин бириэмийэҕэ тигистэ. Кыыска бриллианнаах көмүс оҥоһугу туттардылар.
«Эдэр суруналыыс» номинация — Анастасия Булатова. Кини “Мост” телеустудьууйаҕа дьарыктанар. Кыысчаан биэриилэрэ туспа буочардаах суруналыыс тахсан эрэрин кэрэһэлииллэр.
«Сыл лиидэрэ» номинация — Валерия Вертецкая. “Куттала суох көлүөһэ” хамсааһын эдэр инспектора. ГИБДД инспектордарын актыыбынай уопсастыбаннай көмөлөһөөччүтэ. 12 саастаах кыысчаан:”Улааттаххына туох идэни талыаххыный?” – диэн ыйыппыттарыгар: “Арассыыйа бэрисидьэнинэн!” – диэн хоруйдаата.
«Саамай айымньылаах оҕо» номинация— Андрей Левин. Бу сайын үгүс ааттаах-суоллаах музыкальнай тэрээһиннэр кыайыылаахтара “Артек” лааҕырга сынньаммыт. Эдэр муусукаан аны “Кэскил” лааҕырга сынньана барар буолла уонна Муусука дэриэбинэтин устун экскурсиянан уонна онно босхо эбиэтинэн наҕараадаланна. Маннык эмиэ бэлиэтииллэр эбит!
«Сыл спортсмена» номинация — Василий Заболоцкай. Уус Алдан улууһун ыччата спорт хас да көрүҥүнэн ситиһиилээхтик дьарыктанар эбит.
«Эдэр учуонай» номинация – Ксения Винокурова. Орто Халыма Ойуһардаах оскуолатын 6-с кылааһын үөрэнээччитэ. Кыысчаан булчут уонна балыксыт эбэтин туһунан пластилинынан мультипликационнай киинэни оҥорон, бэйэтин аатын дорҕоонноохтук ааттатта.
Көрөөччү биһирэбилэ» номинацияҕа 9554 куолаһы хомуйан,“Күн Түмэр” ырыа бөлөҕө ылла. Уус-уран салайааччы Елена Старостина Хотун-Арылы бириэмийэ туттарыытын кэмигэр долгуйуон долгуйда!
“Саамай кырачаан кыттааччы” номинация хаһаайынынан үс саастаах Семён Григорьев буолла.
Кыайыылаах оҕолору министиэристибэлэр уонна биэдимистибэлэр эппиэттээх салайааччылара наҕараадалаатылар. Кинилэр сүрүн бэлэхтэрэ аныгы үйэ оҕотугар олус наадалаах – планшет.
Быйылгы тэрээһин олус элбэх киһини муста. Онон наҕараадалары туттарааччылар Оҕо бириэмийэтин эһиилгиттэн тыйаатырдарга ыытарга санааларын тиэртилэр. Оннук да буолара буолуо — Саха сирэ талааннаах оҕолорунан аатырыан аатырар. Эһиил көрсүөххэ, диэри Оҕо талаанын, ситиһиитин бигэргэтэр бириэмийэ!
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.