Өрөспүүбүлүкэҕэ доруобуйаны чэбдигирдэр лааҕырдары арыйыыны улуустар быһаараллар.
Бу иннинэ Дьокуускай куорат уокуруктааҕы дьаһалтатыгар, куоракка эпидемиологическай быһыынан-майгынан, быйыл күнүскү лааҕырдарга оҕолор сынньалаҥнара бэс ыйын устатыгар дистанционнай киэбинэн тэриллэрин туһунан иһитиннэрбиттэрэ. Хонугу эргиччи үлэлиир куорат таһынааҕы чэбдигирдэр лааҕырдар «сабыылаах» эрэсииминэн үлэлииллэр.
«Доруобуйаны чэбдигирдэр лааҕырдары арыйары хас биирдии муниципалитет бэйэтэ быһаарар. Сүрүнэ — улахан дьон быһыыны ылбыт буолуохтаахтар. Оттон оҕолор маннык усулуобуйалаах лааҕырдарга сылдьалларын, сылдьыбаттарын төрөппүттэр быһаараллар», — диир Ольга Балабкина.
Маны сэргэ, улуустартан, Арктика оройуоннарыттан эмиэ, оҕолор өрөспүүбүлүкэ таһыгар сынньана барыылара тэриллэрин эттэ. Бэлиэтээн эттэххэ, СӨ Үөрэх уонна наука миниистирэ Михаил Сивцев тустаах министиэристибэ линиятынан, Краснодар уонна Приморье кыраайдарыгар лааҕырдарга сынньалаҥынан уонна чэбдигирдиинэн 379 оҕо хабыллыахтааҕа былааннаммытын иһитиннэрбитэ.