Ил Дархан Айсен Николаев оҕо саада тутуллан бүттэҕинэ, аны, оскуола тутуутугар ылсарга соруйда.
Дьокуускайга Кузьмин уулуссатын 25-гэр 240 оҕо сылдьарыгар аналлаах үс мэндиэмэннээх уһуйаан тутулла турар. Бу үлэ былырыын от ыйыгар саҕаламмыта, «Демография» национальнай бырайыак иитинэн тутуллар. Билиҥҥи туругунан 55 % бэлэм.
Бүгүн, от ыйын 17 күнүгэр, Ил Дархан Айсен Николаев итиннэ үлэ-хамнас хаамыытын тиийэн көрдө, бэрэбиэркэлээтэ. Бэдэрээччит истиэнэни сыбааһын үлэтэ, бастакы мэндиэмэн муостатын сылытыы, иһирдьэ кирилиэскэ тутуһар сыҥаһа, түннүктэр, холуодалар, о.д.а. толору ситэриллибитин-хоторуллубутун иһитиннэрдэ. Билигин истиэнэ уонна муоста билиитэтин уураллар, салгыы истиэнэни бүрүйүөхтээхтэр.
Уһуйаан сирэ-уота күрүөлэммит, массыына туруорар, кэлэр-барар суолу тупсарыы үлэтэ ыытыллар.
Тутууга 45 киһи үлэлиир, эбийиэги сыл бүтүүтүгэр туттарар былааннаахтар.
Үлэни-хамнаһы көрөн-истэн баран, Ил Дархан социальнай суолталаах тутууну Новопортовской түөлбэтин олохтоохторо олус күүтэллэрин эттэ. Уһуйааны болдьоммут кэмигэр бүтэрэллэригэр сыал-сорук туруорда.
«Үлэ кыраапык быһыытынан салҕанар. Эбийиэк сыл бүтүүтэ тутуллан бүтэн манна оҕолору ылбытынан барыахтаахтар. Дьокуускай куоракка бу түөлбэ саамай кэҥээн, улаатан иһэр оройуон. Онон уһуйааны тутан бүтэрэн баран, манна 1 200 миэстэҕэ оскуоланы тутуу саҕаланыа. Куорат салалтатыгар оннук сорук туруорулунна«, — диэтэ Айсен Николаев.
Андрей Сорокин (СИА) хаартыскаҕа түһэриилэрэ
+1
+1
+1
+1
+1
+1
+1