Ахсынньы 20 күнүттэн тохсунньу 19 күнүгэр диэри А.Е.Кулаковскай аатынан норуоттар доҕордоһууларын дьиэтигэр, Дьокуускайга, «Вкус детства» диэн оҕо саас дьоллоох кэмнэрин санатар, онно эргилиннэрэр бэртээхэй уонна ураты ретро-быыстапка ыытылла турар. Бу туһунан норуоттар доҕордоһууларын дьиэтин пресс-сулууспатыттан иһитиннэрэллэр.
Ретро-быыстапкаҕа 1950-1990 сыллардааҕы минньигэс астар суулара, хаалара мунньуллубут.
—Наһаа кырасыабай ойуулаах-бичиктээх кэмпиэт сууларын, сакалааттар, туортар хааларын көрөннөр, дьон-сэргэ эргиллибэт дьоллоох кэмнэрин, оччотооҕу кистэлэҥ ыра санааларын ахтан-санаан ааһыахтара, оҕо саас «минньигэс амтанын» амтаһыйыахтара. Быыстапка кинилэри оччотооҕу дьиэ кэргэн истиҥ, сылаас, сымнаҕас иэйиитигэр сиэтэн киллэриэҕэ.
Хас биирдии кэмпиэт суута искусство айымньытын курдук кэрэтинэн, уратытынан сөхтөрүө, долгутуо. Бу көннөрү араас өҥнөөх, чаҕылхай кумааҕылар эрэ буолбатах, бу кэм массыынатын курдук! Хас биирдии минньигэс кэмпитэ, сакалаат суута, хаата хайдах уларыйан-тэлэрийэн испитин болҕойон көрдөххө, ааспыт кэм дуораанын, дойду, норуот олоҕор бэлиэ түгэннэри көрүөххэ сөп. Умнуллубат оҕо сааска эргилиннэрэн ылар, дьоллоох кэмҥэ ыалдьыттатар быыстапка А.Е.Кулаковскай аатынан норуоттар доҕордоһууларын дьиэтин фойетыгар күн аайы үлэлиир. Кэлиҥ, сылдьыҥ, көрүҥ. Саамай кэрэ, дьоллоох кэмҥитигэр, оҕо сааскытыгар ыалдьыттааҥ! — диэн иһитиннэрэллэр.
Быыстапкаҕа Эльвира Николаевна Семенова – Сэргэ Кыыһа Тускулаана, «Кэллиэксийэлээччилэр түһүлгэлэрэ» кэллиэксийэлээччилэр өрөспүүбүлүкэтээҕи бөлөхтөрүн салайар, Дьокуускайга Ньурба улууһуттан төрүттээх кэллиэксийэньиэрдэр салайааччылара, Надежда Гавриловна Усова, «Саха сирин кэллиэксийэньиэрдэрэ» РОО правлениетын чилиэнэ, Саха сирин филателистарын Сойууһун чилиэнэ, Марианна Андреевна Чикачева , Хатас кэллиэксийэньиэрдэрин уопсастыбатын чилиэнэ, Анисия Борисовна Калачева, Хатас кэллиэксийэньиэрдэрин уопсастыбатын чилиэнэ кытталлар.
