Бэҕэһээҥҥиттэн “Оскуола иннинээҕи үөрэхтээһин: кэнэҕэски кэмҥэ инвестициялар” диэн өрөспүүбүлүкэтээҕи маҥнайгы форум саҕаланна. Саха сирин бары улуустарыттан, уопсайа, 700 педагог кэллэ.
edersaas.ru
Саха өрөспүүбүлүкэтин бастакы бэрэсидьиэнэ, судаарыстыбаннай сүбэһит Михаил Николаев оҕо билиитэ кыра сааһыгар күүскэ сайдарын ыйар. “Оскуола иннинээҕи тэрилтэлэр муниципальнай бас билиигэ бэриллэн, кэлин биир кэлим систиэмэттэн тэйии баара биллэр. Онон биир кэлим систиэмэни олохтуур инниттэн ассоциация дуу, академия дуу тэрийиэххэ наада”, — диэн этэр. Итиэннэ өрөспүүбүлүкэтээҕи уопсастыбаҕа (төрөппүттэр, интэлигиэнсийэ…) сигэниэххэ диир. Маныаха дьоппуоннар холобурдарын ыйар.
Ыам ыйын бүтүүтэ Москваҕа норуоттар икки ардыларынааҕы кэмпириэнсийэ ыытыллыахтаах. Саха сирэ манна “фокуснай” эрэгийиэн быһыытынан киирбит. Сахалыы быһаардахха, өрөспүүбүлүкэ оскуола иннинээҕи үөрэхтээһиҥҥэ инники күөҥҥэ илдьэ сылдьар уопутун, саҥаны киллэрии бастыҥ бырайыактарын тас дойдуларга, атын эрэгийиэннэргэ көрдөрүөхтээх. Миниистир Владимир Егоров: “Сыллата элбэх уһуйааны үлэҕэ киллэрэбит, билигин дьааһылалары, төрөппүттэргэ сүбэлиир-амалыыр пууннары тэрийэбит. Итини тэҥэ, улахан болҕомтону оҕону кыра сааһыттан сайыннарыыга, оҕо кыаҕын арыйыыга уурабыт”, — диэн кэпсиир. Итиэннэ “Бары уруһуйдуубут”, “Муусука — барыбытыгар”, “Айдарыылаах оҕо”, “Саахымат — барыбытыгар”, “Полилингвальнай уһуйаан”, о.д.а. үгүс бырайыактар үлэлииллэрин, уһуйааннар көхтөөхтүк кытталларын этэр. Сорохтор бэйэлэрэ айаллар, олоххо киллэрэллэр. Онон тэрээһиҥҥэ бу бырайыактары атыттарга көрдөрөр, сыымайдыыр инниттэн форум ыытыллар.
Оттон быыстапкаҕа туох суоҕуй?! Күн талбыта барыта баар! Маны көрөн туран Саха сирин оскуола иннинээҕи үөрэхтээһинэ Арассыыйаҕа инники күөҥҥэ сылдьар дииллэрин чахчы итэҕэйэҕин. Кырдьыга да оннук. Иитээччилэр оҕону сайыннарарга туһанар ньымалара хааһахтан хостонон иһэрдии тахсан иһэр. Бастыҥ бырайыактары аан дойду дьонугар көрдөрүөхтэрэ.
Людмила ПОПОВА, “Саха сирэ” хаһыат, edersaas.ru