102 тыһыынча тылы тылбаастыыр, 45 мөлүйүөн тылы дьүөрэлиир саҥа электроннай тылдьыт таҕыста. Бу туһунан дьон санаатын ыйыталастыбыт. Тылдьыты edersaas.ru/slovar саайтка киирэн булуохха сөп.
Саргылаана Ноева, литературовед, филологическай наука хандьыдаата:
—Саха тыла киэҥ эйгэҕэ хото туттулунаҕына эрэ тыыннаах хаалар кыахтааҕын бары билэбит. Онуоха аныгы үйэ тэтимигэр киирэн, аныгы технологиялары туһанар буоллахха, тылы ылыныы, үөрэтии ордук табыгастаах буолар. Билиҥҥи үйэ киһитэ информацияны тута уонна кэбэҕэстик буларга кыһаллар.
Онуоха информационнай хонууттан, аан ситимтэн наадыйаргын чуо булан ылар олус сөптөөх дии саныыбын. Кэлин тылы, литератураны үөрэтэргэ кыаҕы бөҕөргөтөр соруктаах онлайн библиотекалар, онлайн тылдьыттар, араас сайтар баар буолан эрэллэрэ хайҕаллаах.
Техническэй наука хандьыдаата Василий Мигалкин электроннай сахалыы-нууччалыы тылдьытын базата киэҥин (102 тыһыынча тыл), онон үгүс тыл болҕомтоҕо киирбитин киһи сэҥээрэр. Университекка үөрэнэр ыччат гуманитарнай уонна техническэй хайысханы алтыһыннарар коллаборациятын сэҥээрэбит. Оҕо-ыччат туһанарыгар олус наадалаах бу бырайыак хайысхата аныгы наука кыаҕын сөптөөхтүк туһанан, өссө да кэҥээн истин.
Ангелина Васильева, “Саха сирэ” хаһыат, edersaas.ru
Хаартыска: СИА.