Төрөппүттэр оҕону иитиигэ эбээһинэстэрэ РФ Конституциятын 38-с ыстатыйатын 2 чааһынан уонна РФ Дьиэ кэргэн кодексатынан олохтонор. Төрөппүттэр (сокуоннай бэрэстэбиитэллэр) оҕолорун иитиитинэн дьарыктаныахтаахтар, кинилэр эт-хаан, психическэй, духуобунай уонна сиэр-майгы өттүнэн сайдалларыгар кыһаллыахтаахтар, үөрэтиэхтээхтэр уонна уопсастыбаҕа туһалаах үлэҕэ бэлэмниэхтээхтэр, уопсастыба дьоһун чилиэнэ буола улаатарыгар сыраларын ууруохтаахтар.
Ыйыллыбыт эбээһинэстэри толорбот буолуу сокуоннай саастарын ситэ илик оҕолор бырааптарын күөмчүлээһин буолар. Ону тэҥэ, оҕо лиичинэс быһыытынан сайдыытын харгыстыыр.
Үгэс курдук, оҕоҕо кырыктаахтык сыһыаннаһыы оҕо эт-сиин эчэйиитин ылан балыыһаҕа киирдэҕинэ эрэ булуллар. Ардыгар оҕо бэйэтэ уопсастыбаҕа кутталлаах дьайыыны оҥорон, быраабы араҥаччылыыр уорганнар харахтарын далыгар киирдэҕинэ, төрөппүт киниэхэ кырыктаах сыһыана, ситэ ииппэтэ, көрбөтө-истибэтэ, дьэ, биллэр.
Сокуоннай сааһын ситэ илик оҕоҕо кырыктаах сыһыанынан кини этин-сиинин биирдэ эчэтии эмиэ билиниллэр, өскөтүн бу дьайыы оҕону иитэр эбээһинэстэн куотунууну кытары эбэтэр оҕону иитиигэ, үөрэтиигэ сатаммат ньыманы туттууну кытары сибээстээх буоллаҕына (оҕону аһаппат-таҥыннарбат, сууйбат-тараабат буолуу, этин-сиинин эчэтэн таһыйыы уо д.а.).
Сатамматах олохтоох дьиэ кэргэни, оҕоҕо хаҕыс сыһыаны эрдэттэн булар наада, тоҕо диэтэр, өскөтүн маннык ыалга миэрэ ылбатахха, араас быһылаан тахсар кутталлаах.
Олоххо көрдөххө, төрөппүт (сокуоннай бэрэстэбиитэл) өттүттэн оҕоҕо хаҕыс сыһыан дьон аахайбат буолуутуттан сылтаан биллибэккэ-көстүбэккэ сылдьар.
Дьиэ кэргэн кодексатын 122-с ыстатыйатынан, оҕотун иитиитинэн ситэ дьарыктаммат, оҕоҕо хаҕыс сыһыаннаах ыал баарын биллэхтэринэ, үөрэх, доруобуйа харыстабылын, социальнай тэрилтэлэр дьаһалталара уонна гражданнар эпиэкэ уонна попечительство уорганнарыгар биллэриэхтээхтэр.
Эпиэкэ уонна попечительство уоргана иһитиннэрии киирбитин кэнниттэн, үс күн иһигэр, оҕолор олорор усулуобуйаларын бэрэбиэркэлиэхтээх. Оҕолор бырааптара кэһиллиитин буллаҕына, бырааптарын көмүскүүргэ миэрэ ылыахтаах, оҕолор доруобуйаларыгар, олохоругар куттал үөскээбит түгэнигэр оҕолору төрөппүттэриттэн (сокуоннай бэрэстэбиитэллэриттэн) былдьыыр уонна төрөппүт быраабын хааччахтыырга эбэтэр быһарга суукка ирдэбил сайабылыанньа киллэрии боппуруоһун быһаарыахтаахтар.
Оҕотун ииппэт-көрбөт, атаҕастыыр төрөппүттэргэ (сокуоннай бэрэстэбиитэллэргэ) сокуон ирдэбилинэн, административнай уонна холуобунай эппиэтинэс көрүллэр.
Убаастабыллаах ааҕааччы, өскөтүн эн оҕону атаҕастыыр чахчыларын биллэххинэ, полицияҕа, эпиэкэ уонна попечительство уорганнарыгар, оҕо быраабын көмүскүүр хамыыһыйаҕа, социальнай тэрилтэҕэ эбэтэр борокуратуураҕа биллэриэх тустааххын!
Вячеслав Андреев,
Чурапчы улууһун борокуруорун э.т., юстиция сүбэһитэ.
Хаартыска: интэриниэттэн.