Былырыыҥҥыттан Арассыыйаҕа оҕо сынньалаҥар кешбэк бырагыраамата киирэн, дойду үрдүнэн 420 тыһ. кэриҥэ оҕо туһаммыта. Быйыл тустаах бырагыраама салҕанар диэн РФ Бырабыыталыстыбатын бэрэссэдээтэлэ Михаил Мишустин иһитиннэрдэ. Бу сырыыга судаарыстыба хас бырыһыаны толуйар?
Дойду бэрэсидьиэнин сорудаҕынан оҕо сынньалаҥын иһин кешбэк бырагырааматын быйыл бырабыыталыстыба эмиэ салгыыр буолла. Ол курдук, РФ Бырабыыталыстыбатын бэрэссэдээтэлэ Михаил Мишустин: “Төрөппүттэр оҕо сынньалаҥын хайдах тэрийэр туһунан толкуйдууллар. Бырабыыталыстыба лааҕырга путевка төлөбүрүн аҥаарын төнүннэрэр. Былырыын манан 420 тыһ. кэриҥэ оҕо туһаммыта. Бу үгүс ыалга көмөлөспүтэ. Бэрэсидьиэн бырагырааманы ыам ыйын 1 күнүттэн саҕалыырга эттэ”, — диэн мунньах кэмигэр иһитиннэрдэ.
Санатан эттэххэ, былырыын бу бырагыраамаҕа оҕо сынньалаҥын тэрийэр өрөспүүбүлүкэ 15 тэрилтэтэ хапсыбыта. 978 путевкаттан аҥаара төннөрүллүбүтэ. Лааҕырга путевканы аахсыйа кэмигэр 2022 сыл ыам ыйын 25 күнүттэн балаҕан ыйын 15 күнүгэр диэри ханнык баҕарар симиэнэҕэ атыылаһыахха сөп дииллэр.
Мэхэниисимэ уларыйбата:
— Төрөппүт оҕотугар анаан “Мир” каартанан оҕо лааҕырыгар путевка атыылаһар;
— Каартаҕа путевка сууматыттан 50 %-нын судаарыстыба төнүннэрэр, ол эрээри, биир атыылаһыы иһин 20 тыһ. солк. тахсыбат;
— Биир оҕо хас да симиэнэҕэ сынньаныан сөп. Маныаха кешбэк ылар туһугар хас сынньалаҥ аайы туспа транзакция оҥорор ирдэнэр;
— Хас да оҕолоох ыал хас биирдии атыылаһыллыбыт путевка аҥаарын төнүннэрэр кыахтаах.
Людмила ПОПОВА, “Саха сирэ” хаһыат, edersaas.ru
Хаартыска: СИАтан