Уопсастыба

Оҕолор лааҕырдара өрөмүөннэниэхтэрэ

Оҕолор лааҕырдарын өрөмүөннүүргэ СӨ Бырабыыталыстыбата 50 мөл. солк. көрдө.

СӨ Үөрэх уонна наука министиэристибэтин пресс-сулууспата иһитиннэрбитинэн, Бырабыыталыстыба бэрэссэдээтэлэ өрөспүүбүлүкэҕэ оҕолор лааҕырдарын өрөмүөннүүргэ субсидияны түҥэтэр туһунан уураахха илии баттаабыт.
Көрүллүбүт үбү-харчыны лааҕырдары  саҥардан биэриигэ уонна хапытаалынай өрөмүөҥҥэ туһаныахтара.
Куонкурус түмүгүнэн субсидияҕа  Алдан, Амма, Үөһээ Бүлүү, Горнай, Ленскэй, Муома, Нам, Таатта, Уус Алдан, Хаҥалас, Чурапчы оройуоннара, Жатай уонна Дьокуускай тигистилэр.
«Өйөбүл лааҕырдар материальнай-тэхиньиичэскэй баазаларын тупсаралларыгар көмөлөөх буолуоҕа. Хомойуох иһин, оҕолор сайыҥҥы сынньалаҥнарын лааҕырдарыгар өрөмүөн оҥоһуллубатаҕа ыраатта. Бу үлэ салҕанан, өрөспүүбүлүкэбитигэр оҕолор сынньаналларыгар үчүгэй усулуобуйа тэриллиэн наада», — диэтэ СӨ Үөрэх уонна наука миниистирэ Михаил Сивцев.
Санатар буоллахха, 2012 -2018 сс. үөрэҕириини сайыннарыы судаарыстыбаннай бырагыраама иитинэн, оҕолор лааҕырдарын өрөмүөннүүргэ сыл ахсын 10 мөл.солкуобайтан улахана суох үп көрүллэр этэ. 2021 сылга бу быраактыка хат киллэрилиннэ уонна субсидия суумата улаата.
Быйыл, 2021 сылга, сайын 573 лааҕыр үлэлиирэ онно 38 775 оҕо сылдьара былааннанар. Санитарнай-эпидемиологическай ирдэбил тутуһуллар. Бастакы симиэнэҕэ былаанынан 269 лааҕыр үлэтин саҕалаата, онно 11040 оҕо сылдьар. Ол иһигэр, 1482 оҕо сылдьар сабыылаах эрэсииминэн үлэлиир 22 стационарнай лааҕыр киирэр.
Уопсайынан өрөспүүбүлүкэ үрдүнэн куорат таһынааҕы  доруобуйаны чэбдигирдэр стационарнай лааҕырдар эргэрбиттэрэ, алдьаммыттара-кээһэммиттэрэ бэлиэтэнэр. 60 %-тан тахса эбийиэккэ хапытаалынай өрөмүөн, саҥардан биэрии үлэтэ ыытыллара ирдэнэр. Стационарнай баазалар, хотугу уонна арктическай оройуоннары киллэрэн туран, 18 оройуоҥҥа суохтар. Оҕолор сайын сүрүннээн күнүскү лааҕырдарга сылдьаллар. Лааҕырдартан уопсайынан 75 % күнүскүлэр, 5,8%  эрэ стационарнайдар.
0
0