Олунньу 9 — 19 күннэригэр Германия киин куоратыгар 67-с норуоттар икки ардыларынааҕы киинэ бэстибээлэ ыытыллар. Тэрээһин NATIVe бырагыраамата быйыл Арктикаҕа ананна. Манна Арассыыйаттан түөрт хартыына көрдөрүллүбүтүттэн үһэ Саха сирин кинематографистарын үлэтэ – Михаил Барынин “24 снега”, Сергей Потапов “Дьөһөгөй оҕото” итиэннэ Прокопий Ноговицын “Оҕо куйуурдуу турара”.
Роман Попов, “Саха сирэ” хаһыат, https://edersaas.ru
Бырагыраамаҕа киирбит үлэлэр омук көрөөччүтүн интэриэһин тартылар. Ону киинэҕэ билиэттэр эрдэттэн атыыланан бүппүттэрэ да туоһулуур. Арктика дойдуларыттан — Гренландияттан, Норвегияттан, Канадаттан, о. д. а. кэлбит хартыыналар, олор ортолоругар Арассыыйаттан Алексей Вахрушев “Повесть о Вуквукае — маленьком камне”, Михаил Барынин “24 снега” Сергей Потапов “Дьөһөгөй оҕото” итиэннэ Прокопий Ноговицын “Оҕо куйуурдуу турара” киинэлэрэ Берлин киинигэр турар «Sony Star IMAX» киинэ тыйаатырыгар көрдөрүлүннүлэр.
Көрөөччү, чуолаан, «24 снега» уонна «Оҕо куйуурдуу турара» киинэлэри интэриэһиргээбит, ыйыталаспыт. Канада посольствотыгар буолбут кэпсэтиигэ саха киинэтэ кэскиллээҕин бэлиэтээбиттэр.
“Сахафильм” үлэһитэ Юрий Бережнев БЕРЛИНАЛЕттэн иһитиннэрбитинэн, Былатыан Ойуунускай айымньытынан уһуллубут “Оҕо куйуурдуу турара” киинэ тула NATIVe бырагыраама чэрчитинэн киэҥ кэпсэтии буолбут. Ойуччу туппуттар, дьиҥ сахалыы тыыннаах киинэ диэн сэргээбиттэр, режиссурата, оператор үлэтэ үрдүк таһымнааҕын бэлиэтээбиттэр. Онуоха бэл, техническэй алҕастара мэһэй буолбаттар диэбиттэр.
Санатар буоллахха, Берлиннээҕи норуоттар икки ардыларынааҕы киинэ бэстибээлэ 1951 сыллаахтан ыытыллар. «Берлинале» Каннаҕа уонна Венецияҕа ыытыллар аан дойду улахан киинэ фестивалларын кытта биир таһымҥа турар.
Роман Попов, “Саха сирэ” хаһыат, https://edersaas.ru