Оҕо кэлээскэтин кини эрэ уоруо дии санаабатах

Ааптар: 
Бөлөххө киир:

Дьокуускайга, Мэҥэ Хаҥаласка, Бүлүүгэ, Нерюнгрига полиция оперативниктара уоруулары арыйдылар. Бу туһунан СӨ ИДьМ-тын пресс-сулууспата иһитиннэрдэ.

edersaas.ru

Дьокуускай куорат полициятыгар Петровскай уулуссатыгар олорор киһи эрийэн, массыынатын бүрүйэр «автосуорҕанын» уорбуттарын иһитиннэрбит. Онто 12 тыһ. солк. сыаналаах.

Уорууга уорбаланан, урут хаста да сууттана сылдьыбыт 40 саастаах киһи тутуллубут .

Ол билиммитинэн, киэһэ хараҥаҕа массыына суорҕанынан бүрүллэн турарын өйдөөн көрбүт уонна туох да саарааһына суох уоран баран, онтун бэрт түргэнник батарбыт.

Полиция «автосуорҕаннары» уордарбат туһуттан, суорҕаҥҥа сотуллубат кыраасканан массыына эбэтэр төлөпүөн нүөмэрин суруйар буолуҥ диэн куруук сүбэлиир. 

Оттон Мэҥэ Хаҥалас улууһун Аллараа Бэстээх бөһүөлэгэр аҕам саастаах дьахтар сиэнин кэлээскэтин хоспоҕуттан уорбуттар. Оперативниктар бу уорууга уорбаланааччыны туппуттарыгар, дьахтар көрбүтүн итэҕэйбэтэх — 31 саастаах ыала дьахтар эбит. «Уларсыан да сөп этэ» диэн эмсэҕэлээччи бэри диэн бэркиһээбит.

Барыллаан быһаарыынан, эдэр дьахтар оҕо кэлээскэтэ хоспоххо баарын билэр эбит уонна биир киэһэ ыйанан турар күлүүһү алдьатан киирэн, ылан тахсыбыт. Итинэн кини 20 тыһ. солк. суумалаах хоромньуну оҥорбут.

Уорбаланааччы билиммитинэн, кэлээскэни кини биир саастаах кыыһыгар анаан уорбут. Дьиибэтэ диэн, ол ыаллыы олорон, кэлээскэни хайдах туттуо эбитэ буолла — киһи бэйэтин малын чуо билэр буоллаҕа эбээт.

Бүлүү улууһун полициятыгар биир киһи эрийэн, кыбартыыратыттан 18 тыһ. солк. сыаналаах икки стеклопакет түннүгүн уорбуттарын эппит. Уорбаланааччыны туппуттар — Ньурбаттан төрүттээх 26 саастаах киһи.

Барыллаан быһаарыынан, хаарбах дьиэттэн көспүт дьон кыбартыыратыгар киирэн, ол икки түннүгү тууран ылбыт итиэннэ батарар санаалаах сылдьыбыт. Түннүктэри хаһаайыныгар төннөрбүттэр.

Нерюнгри оройуонун Серебрянай Бор бөһүөлэгин олохтооҕо полицияҕа эрийэн, 26.990 солк. сыаналаах суотабай төлөпүөнүн уорбуттарын иһитинэрбит.

Бу эмсэҕэлээччи тутуу тэрилтэтигэр үлэлиир эбит. Биир күн үлэһиттэр бары киирэр-тахсар оробуочай вагончиктарыгар төлөпүөнүн ииттэрэ ууран баран барбыт. Онтон кэлбитэ — төлөпүөнэ мэлигир.

Оперативниктар уорбаланааччыны туппуттар — бу тэрилтэҕэ үлэлиир Нерюнгри куорат 25 саастаах олохтооҕо.

Уорбаланааччы быһаарбытынан, төлөпүөнү билэр кыыһыгар быстах туттарга диэн уларсык биэрбит. Онтон сотору буолан баран, эппиэтинэстэн куттанан, төлөпүөнү төннөрүөн баҕарбыт да хойутаабыт — уорбута арыллан тутуллубут.

Бу чахчыларынан «уоруу» ыстатыйанан холуобунай дьыалалар тэриллибиттэр.

Биһиги корр., «Саха сирэ» хаһыат, edersaas.ru

Хаартыска: интэриниэттэн.

+1
0
+1
0
+1
0
+1
0
+1
0
+1
0
+1
0