Бүгүн — Оҕо көмүскэлин күнэ!
Олох-дьаһах

Бүгүн — Оҕо көмүскэлин күнэ!

Бүгүн киин куорат болуоссаттара оҕо-аймах саҥатынан-иҥэтинэн, көр-күлүү ырыатынан туоллулар. Куорат үрдүнэн  элбэх дьэрэкээн шардар, өҥнөөх мыыла хабахтара күөрэйэ көттүлэр. Ленин болуоссатыгар сарсыарда эрдэттэн ырыа-тойук, үҥкүү-битии, күлүү-салыы бөҕөтө. Бүгүн — аан дойдутааҕы Оҕо көмүскэлин күнэ.

 

Дьокуускай сүрүн болуоссата бэс ыйын 1 күнүгэр оҕо дойдутугар кубулуйда. Тула өттүҥ, ханна да көр, араас саастаах оҕолор үөрүүлэринэн, күлүүлэринэн киэркэйбит: Мальвина курдук таҥныбыт кыргыттар, Буратино буолбут уолаттар, хаартыскаҕа түгэни түһэрээри түбүгүрбүт төрөппүттэр. Улахан сыанаҕа оҕо ансаамбыллара, бөлөхтөрө, биирдиилээн кыттааччылар үҥкүүлээн, ыллаан, хоһоон ааҕан, мээчик тэбэн дьон-сэргэ сүргэтин көтөҕөллөр. Тула турбут балааккаларга оҕолорго анаммыт араас түмсүүлэр бэйэ оҥоһуктарын, ситиһиилэрин көрдөрүүгэ уурбуттар. «Бичик» кинигэ кыһата, «Кванториум» технопарк, «Юные якутяне» ресурснай киин, «Кэскил» оҕо сайыҥҥы лааҕыра уо.д.а.

Сыанаттан тэйиччи уончалыы остуолу кэрийэ сылдьан аан дойдутааҕы саахымат уонна дуобат күрэхтэрин кыайыылаахтара хас биирдии баҕалааҕы кытта партия оонньууллар. Күүстэрин холонон көрбүттэр истэригэр кыра оҕоттон саҕалаан улахан дьоҥҥо тиийэ бары бааллар.

Болуоссакка улам дьон элбиир, куоракка бастакы сайыҥҥы күн куйааһа түһэр, ол кэмҥэ Герман уонна Клавдия Хатылаевтарга үөрэнэр оҕолор барабааннарын тыаһа күүһүрэн барар. Өрөспүүбүлүкэ Ил Дарханын ыйааҕынан төрүттэммит Аан дойдутааҕы Интеллектуальнай оонньууларга диэри 37 күн хаалла диэн биллэрэллэр. Үүнэн турар мас быһыытынан оҥоһуллубут истиэндэҕэ хас күн хаалбытын кэтиир кыһыл сыыппаралар, дьон ытыһын тыаһынан доҕуһуолланан, холбонон, умайан кэлэллэр. Хасыһын да бу күн куорат үрдүнэн дьэрэкээн шариктар көтөллөр. Улахан сыанаҕа үҥкүү-битии салҕанан барар.

 

Туораттан көрдөххө, Ленин болуоссата туспа арыы курдук. Онно иһиллэр бырааһынньык аймалҕана, болуоссаттан ырааттыҥ эрэ чуумпурар. Ол да буоллар, уулуссалар устун үөрбүт, дьолломмут, илиилэригэр шарик тутуурдаах оҕолор үгүстэр. Оҕо дьолуттан ордук бу сиргэ төрөппүккэ, биллэн турар, туох да суох. Ол иһин маннык үрдүк үөрүүнэн туолбут күн элбиирин, оҕо сайдыытын туһугар, кини билиитин хаҥатарга, дьоллоох оҕо сааһы бэлэхтииргэ кыһаллыах тустаахпыт.

Болуоссаттарга өссө да өр оҕо-аймах үөрбүт-көппүт саҥата-иҥэтэ уурайбат, дьон хаамсааһына уоскуйбат. Ырыа-тойук өргө диэри тохтообот.

Света ИВАНОВА, «Саха сирэ» хаһыат, edersaas.ru сайтка анаан

Вадим Скрябин түһэриилэрэ.

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

четырнадцать + 19 =