Оҕо көмүскэлин күнүгэр истиҥ дьүөгэлиилэр ыра санаалара туолла.
Уон саастаах дьүөгэлиилэр Лиза Кочнева уонна Нарыйаана Васильева СӨ Арассыыйа Бэрэсидьиэнигэр бастайааннай бэрэстэбиитэлистибэтигэр ыалдьыттаатылар диэн Москваттан Саха сирин пресс-киинэ иһитиннэрэр.
Иккилэриттэн доҕордоспут төрдүс кылаас үөрэнээччилэрин туһунан Саҥа дьыл саҕана биллибит. Нарыйаана Васильева СӨ Ил Дарханыгар дьүөгэтин туһунан олус истиҥник суруйбут.
«Хас сыл аайы мин Тымныы оҕонньорго сурук суруйабын да, хоруйу туппаппын. Бу сурукпун эһиги хайаан да ааҕыаххыт уонна биһиэхэ көмөлөһүөххүт дии саныыбын. Мин дьүөгэлээхпин, кини аата Лиза Кочнева диэн. Киниэхэ уустук эпэрээссийэни оҥорбуттара, онон кыратык көрөр буолбута. Кини анал оскуолаҕа үөрэнэр. Мин Лизочкам наһаа өйдөөх, үтүө, сырдык санаалаах. Кини мөлтөхтүк көрөрүн иһин аһынабын», — диэн Нарыйаана суруйбут.
Дьүөгэтэ Москваҕа сылдьыаҕын эбэтэр муораҕа сынньаныаҕын наһаа баҕарар буолан, Нарыйаана суругун почтанан буолбакка, тус бэйэтэ СӨ Ил Дарханын уонна Бырабыыталыстыбатын дьаһалтатыгар аҕалан туттарбыт.
Маныаха Саха Өрөспүүбүлүкэтин салалтата «Үтүө санаа харыйата» аахсыйанан, кыргыттар ыра санаалара туоларыгар көмөлөһөргө быһаарыммыт. Оҕолор санааларын толорорго РФ Бэрэсидьиэнигэр СӨ Бастайааннай бэрэстэбиитэлэ Андрей Федотов кыттыһан, Бастайааннай бэрэстэбиитэлистибэҕэ туруоруллубут харыйаттан аан бастаан сиэннэрин кытары оҕолор ыра санааларын суруйбут оонньуурдарын ылбыт.
Маннык көмө баар буолан, бэс ыйын 1 күнүгэр — Оҕо көмүскэлин күнүгэр, кыргыттар эбээлэрэ арыаллааһынынан, Бастайааннай бэрэстэбиитэлистибэҕэ сырыттылар. Манна дьүөгэлиилэргэ өйдүү-саныы сылдьалларыгар бэлэхтэр уонна «Москвариумҥа» билиэттэр туттарылыннылар. Кыргыттар Кыһыл болуоссаты көрөллөр, салгыы Москвариумҥа бараллар. Онно кинилэри наһаа үчүгэй бэлэх күүтэр, тириэньэр арыаллааһынынан, кыргыттар дельфиннэри кытары устуохтара. Онтон салгыы икки нэдиэлэ устата Хара муораҕа сынньаныахтара.
«Бу кыырпах да саҕа хос санаата суох, аттыгар баар киһиэхэ туох эрэ наһаа үчүгэйи, үтүөнү, кэрэни оҥорор баҕа санаалаах олус истиҥ, үтүөкэн дьүөгэлиилэр тустарынан кэпсэнэр. Мин бу икки кыыска үөрүүнэн көмөлөстүм. Нарыйааналаах Лиза саамай истиҥ, саамай сырдык баҕа санаа чахчы туоларыгар эрэллээхтэрин көрдөрдүлэр. Биһигиттэн, улахан дьонтон, Сахабыт сирин эдэркээн олохтоохторун сарсыҥҥы күннэрэ тутулуктаах. Биһиги оҕолор олохторо сырдык уонна үөрүүлээх буоларын туһугар кыһаллыахтаахпыт», — диэтэ Андрей Федотов.
sakha.gov.ru
+1
+1
+1
+1
+1
+1
+1