Дьокуускайга Сэргэлээх суолун 12 км 34 №-дээх коррекционнай оскуола миэстэтигэр доруобуйаларыгар хааччахтаах оҕолорго аналлаах үөрэтэр адаптивнай комплекс тутуллуоҕа. Бүгүн, от ыйын 3 күнүгэр, СӨ Ил Дархана Айсен Николаев итинник быһаарда.
Бастаан муниципалитет салалтата манна 120 миэстэлээх интэринээттээх, 350 оҕо үөрэнэригэр аналлаах саҥа коррекционнай оскуоланы, аттыгар 2000 оҕо үөрэнэригэр орто оскуоланы тутары былааннаабыт. Ол эрээри, төрөппүттэр уонна педагогтар манна икки оскуола тутулларын утарбыттар уонна Ил Дархаҥҥа санааларын тиэрдибиттэр.
Социальнай ситимнэринэн элбэх этиилэр киирбиттэринэн, ол иһигэр бэҕэһээҥҥи быһа сибээс кэнниттэн, Айсен Николаев куорат баһылыга Евгений Григорьевы кытта оскуола тутуллуохтаах сиригэр-уотугар бара сырытта уонна кэлэктииби, төрөппүттэри кытары көрүстүлэр.
Көрсүһүү кыттыылаахтара эппиттэринэн, икки тыһыынча миэстэлээх оскуоланы тутууну былырыын мэрия быһаарбыт, ол гынан баран, бу туһунан кинилэр соторутааҕыта билбиттэр.
«Маннык быһаарыыны биһигини кытта былырыын ким да дьүүллэспэтэҕэ. Төһө да улахан сир-уот буолбутун иһин, биир учаастакка икки эбийиэги: орто оскуоланы уонна социальнай адаптация киинин тутар табыллыбат», — диэтилэр төрөппүттэр.
Айсен Николаев санааларын истэн баран, доруобуйаларыгар хааччахтаах оҕолорго улахан адаптивнай үөрэтэр комплексы тутарга этии киллэрдэ.
— Мин манна урут хаста да кэлэ сылдьыбытым, оҕолору кытары сэһэргэспитим, бу ураты оҕолор, кинилэргэ ураты усулуобуйа наада. Бу сир-уот оҕолор күөмчүлэммэттэрин курдук сананалларыгар сөп түбэһэр. Манна эргиччи күөх үүнээйи, ыраас салгын, сынньанарга сөптөөх сир. Ол иһин, мин манна доруобуйаларынан хааччахтаах оҕолорго интэринээттээх, уһуйааннаах улахан оскуоланы тутарга этии киллэрэбин. Өссө барытын көннөрү оскуолатааҕар ордук оҥоруохха наада, — диэтэ. Оттон икки тыһыынча оҕо үөрэнэр оскуолатын куорат кытыытыгар тутар сөбө суоҕун эттэ.
Ил Дархан адаптивнай комплекска кэлэр өртүгэр тута икки коррекционнай оскуола — 34 №-дээх оскуола уонна 22 №-дээх анал (коррекционнай) оскуола көһөн кэлэллэригэр этии киллэрдэ. Бу икки оскуола олус эргэлэр. 34-с оскуоланы бүгүн көтүрэллэр — бу Дьокуускайга бүтэһик мас оскуола этэ. Оттон 22 №-дээх оскуола 1962 сыллаахха тутуллубут урукку оҕо саадын дьиэтигэр баар.
34 №-дээх коррекционнай оскуолаҕа доруобуйаларынан хааччахтаах 293 оҕо үөрэнэр. Ол иһигэр 170 оҕо инбэлиит. 22 №-дээх оскуолаҕа доруобуйаларынан хааччахтаах 254 оҕо үөрэнэр, ол иһигэр 94 оҕо инбэлиит.
Айсен Николаев адаптивнай комплекс тутуллар кэмигэр кинилэргэ миэстэлэрин булан олохтуур боппуруоһу быһаарарга соруйда. Маныаха куорат баһылыга Евгений Григорьев Бүлүүлүүр суол 4 км баар Байкаллааҕы судаарыстыбаннай университет (БГУЭП) урукку дьиэтин биэрэргэ этии киллэрбитин Ил Дархан биһирээтэ уонна быйыл сайын онно өрөмүөн оҥороллоругар дьаһал биэрдэ.
Көрсүһүү түмүгэр Ил Дархан төрөппүттэргэ уонна педагогтарга бу боппуруоһу тус хонтуруолугар тутуох буолла.
Бастакы быһаарыынан, комплекска үөрэнэргэ 550 миэстэ, 200 миэстэ оскуолаҕа киириэн иннинээҕи саастаах оҕолорго, оттон интэринээккэ 350 оҕо олороругар диэн. Өрөспүүбүлүкэ салалтата манна, комплекс сиригэр-уотугар, өссө бассейн уонна сылы эргиччи үлэлиир тэпилииссэ баар буолуон баҕарарын биллэрдэ.
Андрей Сорокин (СИА) хаартыскаҕа түһэриитэ.
+1
+1
+1
+1
+1
+1
+1