Оччоҕо «Модун» национальнай успуорт көрүҥнэрин киинигэр «Чөмпүйүөн буол» тиэстээһин киинигэр кэлэҥҥин оҕоҕун тургутан көр.
edersaas.ru
Бүгүн, кулун тутар 26 күнүгэр, бырайыак үөрүүлээх аһыллыытыгар СӨ уус-уран гимнастикаҕа федерациятын бэрэсидьиэнэ Людмила Николаева, СӨ Успуордун миниистирэ Иннокентий Григорьев, АЛРОСА хампаанньа Дьокуускайдааҕы салаатын начальнигын солбуйааччы Анатолий Бравин, «Чөмпүйүөн буол» бырайыак эрэгийиэннээҕи администратора Светлана Мартюшова кыттыыны ыллылар.
Бырайыагы төрүттээччи Людмила Николаева:
—Бу аппараат – төрөппүккэ көмө. Араас тэриллэр көмөлөрүнэн, оҕо түөрт түһүмэхтээх чинчийиини ааһар. Бастатан туран, оҕо антропометрическай көрдөрүүлэрин билэбит. Онно, ыйааһынын, үрдүгүн билэрбит таһынан, холобура, илиитин-атаҕын олоруутун кытта билиэххэ сөп. Иккиһинэн, функциональнай көрдөрүүлэри билэбит. Ол эбэтэр, былчыҥын тутулун, төһө тулуурдааҕын о.д.а. Үсүһүнэн, оҕо психо-эмоциональнай туругун бу аппарат эмиэ быһаарар. Төрдүһүнэн, спортивнай тургутуу эмиэ баар.
СӨ Успуордун миниистирэ Иннокентий Григорьев:
—Оҕо ханнык успуорка дьоҕурдааҕын билэр ыарахан буолааччы. Сорох төрөппүттэр бэйэлэрин туолбатах баҕа санааларын оҕолорунан толороору, тустуук буолаҕын диэн этэн кэбиһэллэр. Ол эрээри, оҕотугар атлет дуу, үҥкүүһүт дуу көрүҥэ быдан барсар буолуон сөп. Аны урут үчүгэй тириэньэрдэр улуустары кэрийэ сылдьан, талааннаах оҕолору көрдүүллэрэ. Кинилэр бэйэлэрин уопуттарыгар, көрүүлэригэр олоҕураллар этэ. Билигин аныгы технология көмөтүнэн оҕо дьоҕурун билиэххэ сөп буолла, – диэн миниистир эттэ.
«Чөмпүйүөн буол» эрэгийиэннээҕи бырайыак салайааччыта Светлана Мартюшова төрөппүттэри ыҥырда. Бастаан «Модун» саайтыгар суруттаран баран анаммыт күҥҥэ кэлэр эбиккит.
Виктория Бястинова, edersaas.ru, «Саха сирэ» хаһыат.
Хаартыска СӨ успуордун министиэристибэтин пресс-сулууспата.