Бүгүн, муус устар 18 күнүгэр, Ил Түмэн уочараттаах 36-с пленарнай мунньаҕар норуот депутаттара оҕо быраабын боломуочуйалааҕын аныырыгар Ил Дархаҥҥа сөбүлэҥнэрин биэрдилэр.
Депутаттар уопсай куоластааһыннарынан өрөспүүбүлүкэҕэ оҕо быраабын боломуочуйалааҕынан СӨ үлэтин уонна социальнай сайдыытын министиэристибэтин социальнай харыстабылын киинин исписэлииһинэн үлэлии олорор Туйаара Васильева ананна. Туйаара Валерьевна иһитиннэрбитинэн, оҕо иитиитигэр уонтан тахса сыл үлэлээбит, итинтэн аҕыс сыл устата – дьиэ кэргэн бэлиитикэтин департаменыгар. Кини биэс оҕо ийэтэ. Ригатааҕы авиационнай университеты, М.К.Аммосов аатынан СГУ, Салайыы институтун үөрэнэн бүтэрбит.
Депутаттар саҥа анаммыт оҕо быраабын боломуочуйалааҕар оҕо аһылыгар, тулаайах эбэтэр төрөппүт көрүүтэ-истиитэ суох хаалбыт оҕолору дьиэлээһиҥҥэ, уустук балаһыанньаҕа түбэспит оҕолорго болҕомтону ордук уурарга эттилэр. Ону таһынан дьиэ кэргэҥҥэ аҕа оруолун күүһүрдэргэ эттилэр.
Аграфена КУЗЬМИНА