Бүгүн СӨ үтүөлээх бырааһа, РФ уонна СӨ доруобуйа харыстабылын туйгуна, СӨ Суруйааччыларын сойууһун уонна Суруйааччылар аан дойдутааҕы сойуустарын чилиэнэ Валентин Егоров 60 сааһын туолла.
edersaas.ru
Валентин Владимирович 1957 с. балаҕан ыйын 5 күнүгэр Дьокуускайга төрөөбүтэ. Сэбиэскэй аармыйаҕа сулууспалаат, Хабаровскайдааҕы медицинскэй институт педиатрияҕа факультетын бүтэрбитэ. Үөрэҕи бүтэрэн баран, Хабаровскай кыраай уһук сытар учаастагар педиатрынан үс сыл үлэлээбитэ.
1987 с. дойдутугар төннөн кэлбитэ. Куорат поликлиникатыгар оҕо хирурунан үлэлээбитэ. Онтон ыла үйэ чиэппэрин оҕо сыстыганнаах ыарыыларын балыыһатыгар реанимация уонна интенсивнэй терапия отделениетыгар анаата. Анестезиологияҕа-реаниматологияҕа уонна педиатрияҕа үрдүк категориялаах быраас.
Валентин Егоров айар үлэнэн 1991 сылтан дьарыктанар. Поэзияҕа уонна прозаҕа тэҥинэн үлэлиир. Нууччалыы тылынан суруллубут хоһооннорун уонна прозатын 13 хомуурунньугун таһааран, ааҕааччылар биһирэбиллэрин ылла.
Эмчит киһи быһыытынан, ыарыһах оҕолору көрүү-истии туһунан төрөппүттэргэ аналлаах 2 кинигэни хомуйан таһаарда.
«Оҕо анестезиолог-реаниматолог бырааһа буоларбынан, олохпун барытын кырачаан дьон доруобай буолалларыгар анаатым. Онон, айар киһи быһыытынан, оҕолор тустарынан суруйбат буолар кыаҕым суох. Үйэ чиэппэриттэн ордук кэм устата айар үлэнэн дьарыктанным», – диэн, ааптар оҕолору, ыччаты иитэр-үөрэтэр суолталаах суруйуулар элбииллэрин туһугар үлэлэһэр. .Кини кэпсээннэрэ «Москва», «Якутяночка», «Полярная звезда» уо.д.а. сурунаалларга бэчээттэнэллэр.
Ааптар – «Саха-Азия оҕолоро» оҕо норуоттар икки ардыларынааҕы фонда, Марта уонна Алексей Михайловтар ааттарынан өрөспүүбүлүкэтээҕи литературнай, С.Н.Сизых аатынан кыраайы үөрэтэр өрөспүүбүлүкэтээҕи бириэмийэлэр лауреттара. Литэрэтиирэҕэ аналлаах бүтүн өрөспүүбүлүкэтээҕи, Арассыыйатааҕы, аан дойдутааҕы куонкурустар хас да төгүллээх лауреаттара уонна дипломаннара.
Надежда ЕГОРОВА, «Саха сирэ» хаһыат, edersaas.ru