Бу күннэргэ Бүлүү улууһун Тылгынытыгар оҕо оонньуур-дьарыктанар былаһаакката үлэҕэ киирдэ.
edersaas.ru
Олохтоох дьаһалта баһылыга Егор Иванов көҕүлээһининэн, былырыын нэһилиэк Саха Өрөспүүбүлүкэтин кэлэр көлүөнэлэрин тус сыаллаах пуондатын «Мин былаһааккам» куонкуруһугар кыайбыта. Бу куонкурус «Сайдыы» диэн бырагыраама «Сырдык кэлэр кэм» бырайыагын чэрчитинэн, «АЛРОСА» аахсыйаламмыт хампаанньа үбүлээһинэн тэриллэр. Бастыҥ бырайыактаах уон биир нэһилиэккэ быйыл сайын аныгы оҥоһуулаах, оҕо аймах эргиччи сайдарыгар анаммыт былааһаакка оҥоһуллуоҕа.
– Былаһаакка матырыйаалын Бүлүүгэ уонна Дьокуускайга олорор биир дойдулаахтарбыт көмөлөрүнэн аҕалтараммыт, бэйэбит таҥан туруордубут. Билигин төгүрүччү олбуор тута сылдьабыт. «Мин былаһааккам» куонкурус көмөтүнэн, биһиги, киинтэн ыраах сытар уһук нэһилиэк, оҕолорбутугар бэртээхэй былаһааккаланныбыт. Манна оҕолор эрэ буолбакка, улахан дьон эмиэ үөрэ-көтө мустар. Сэлиэнньэбитин тупсаран оҥорорго бу үчүгэй тирэх, – диир нэһилиэк баһылыга Егор Иванов.
Раиса Сибирякова, «Саха сирэ» хаһыат, edersaas.ru