СӨ Ил Дархана Айсен Николаев 2020 сыл сэтинньи 30 күнүгэр таһаарбыт Ыйааҕыгар олоҕуран, оҕо 3 сааһыттан 7-гэр диэри төлөнөр ыйдааҕы босуобуйатын бэрээдэгэр уонна усулуобуйатыгар уларыйыылар киирдилэр.
Ол курдук РФ Бырабыыталыстыбатын уурааҕынан киирбит уларыйыылар учуоттаннылар. Онон РФ холуобунай-исполнительнай систиэмэтин уорганнарын уонна тэрилтэлэрин, куттал суох буолуутун федеральнай уорганнарын, судаарыстыбаннай охрана, ис дьыала уорганнарын үлэһиттэрэ туһааннаах көмөнөн туһаныыга сайабылыанньа (если заявитель и (или) его супруг (супруга) является сотрудником учреждений) биэрэр буоллахтарына, Нэһилиэнньэ социальнай харыстабылын управлениетыгар дохуоттарын туһунан докумуоннарын бэйэлэрэ биэриэхтээхтэр.
Иккиһинэн, биир киһиэхэ тиксэринэн дохуот орто кээмэйин ааҕыыга дьиэ кэргэн састаабын ааҕыы бэрээдэгэ уларыйда. Ол эбэтэр регистрацията суох төрөппүттэр бииргэ олорор түгэннэригэр, иккиэн дьиэ кэргэн састаабыгар киллэриллэр буолуохтара.
Маны таһынан уларытыыларга өссө маннык көмө миэрэлэрэ киирдилэр. Эмтэнэ биитэр доруобуйаны чөлүгэр түһэрэ барыыга (реабилитация) туһаныллар бырайыас төлөбүрэ, үһүс уонна онтон кэлэр оҕоҕо төлөнөр ыйдааҕы төлөбүрдэр, ийэ хапытаала, «Дьиэ кэргэн» өрөспүүбүлүкэтээҕи хапытаал үбэ-харчыта дьиэ кэргэн дохуотугар киирбэт буолла.
СӨ Үлэҕэ уонна социальнай сайдыыга министиэристибэтэ