“Хайа баҕарар бырайыак энтузиастар күүстэринэн сайдар, олоххо киллэриллэр”, — диэтэ от ыйын 4 күнүгэр Дьокуускайга III “Муусука — барыбытыгар: норуоттар икки ардыларынааҕы маастар-кылаастартан – норуоттар икки ардыларынааҕы куонкурустарга” кэнгириэс үлэтин түмүктүүр тэрээһиҥҥэ СӨ Судаарыстыбаннай сүбэһитэ, РФ норуодунай артыыһа, кэнгириэһи уонна куонкуруһу тэрийэр кэмитиэт бэрэссэдээтэлэ Андрей Борисов.
Чахчы да, СӨ бастакы бэрэсидьиэнэ Михаил Николаев көҕүлээһининэн саҕаламмыт, тэриллибит бу үрдүк миссиялаах “Муусука – барыбытыгар” бырайыак биһиги өрөспүүбүлүкэбитигэр үлэлээбитэ хайыы үйэҕэ 5 сыл буолла. Оттон В.А.Босиков аатынан СӨ Муусука үрдүкү оскуолата үйэ чиэппэрин – 25 сааһын туолла.
Бу 5 сыл иһигэр “Муусука – барыбытыгар” бырайыак РФ үөрэхтээһинин эйгэтигэр инновационнай бырайыактар истэригэр киллэрилиннэ итиэннэ ЮНЕСКО өйөбүлүн ылла.
Бу бэлиэ дааталарга анаммыт, араас омук дойдуларын уонна Арассыыйа, Саха сирин мусукааннара, искусствотын уонна култууратын диэйэтэллэрэ кыттыылаах норуоттар икки ардыларынааҕы кэнгириэс сүрүн тэрээһининэн, быйыл аан бастакытын ыытыллыбыт, 400-тэн тахса эдэр мусукаан кыттыылаах “Саһарҕа хоптото” куонкурус буолла.
Кэнгириэс кыттыылаахтара фортепианоҕа, скрипкаҕа, виолончельга итиэннэ “Муусука-барыбытыгар” номинация дьүүллүүр сүбэлэрин бэрэссэдээтэллэрэ, Муусука аан дойдутааҕы Сэбиэтин вице-бэрэсидьиэнэ Шейла Вудворд бэлиэтээбиттэринэн, саамай сүрүнэ, бу бырайыак, оҕо барыта талааннааҕын, арай ону арыйыыга, сайыннарыыга хас биирдии оҕоҕо тустаах, ураты болҕомтолоох сыһыан ирдэнэрин көрдөрдө.
Ол курдук, холобур, икки сыллааҕыта 7 саастаах эдэркээн пианистка Аида Филиппова “Щелкунчик” эдэр мусукааннар норуоттар икки ардыларынааҕы ХVIII телевизионнай куонкурустарыгар дипломант буолары ситиспитэ. Кини “Муусука – барыбытыгар” бырайыакка 4 сааһыттан кыттар.
“Бүгүн муусуканан дьарыктанар биһиги оҕолорбут майгылара, хараактардара буһар-хатар, санаалара бөҕөргүүр, күүһүрэр, онон, кинилэр инникилээх, кэрэ кэскиллээх буолуохтара диэн эрэнэбин”, — диир кэнгириэс кыттыылаахтарыгар туһаайыы этиитигэр Михаил Ефимович Николаев.
Кэнгириэскэ СӨ Үөрэҕин миниистирэ Владимир Егоров, СӨ Култууратын, духуобунай сайдыытын миниистирэ Юрий Куприянов, уо.д.а. дириҥ ис хоһоонноох дакылааттары оҥордулар.
Түмүккэ “Муусука — барыбытыгар: норуоттар икки ардыларынааҕы маастар-кылаастартан – норуоттар икки ардыларынааҕы куонкурустарга” III кэнгириэс кыттыылаахтара туһааннаах Меморандум уонна эрэкэмэндээссийэ ылыннылар.
Татьяна Маркова.
Ааптар хаартыскаҕа түһэриилэригэр: эдэркээн пианистка Аида Филиппова; куонкурус кыайыылааҕа Дарья Шахурдина (скрипка, Муусука үрдүкү окуолата).