Бырабыыталыстыба бэрэссэдээтэлин солбуйааччы Ольга Балабкина бүгүн быһа сибээс кэмигэр, муус устар 20 күнүгэр, өрөспүүбүлүкэҕэ балаһыанньа хайдах туруктааҕын билиһиннэрдэ.
edersaas.ru
Эрдэ этиллибитин курдук, бүгүҥҥү туругунан өрөспүүбүлүкэҕэ 111 киһи ыалдьыбыта биллэр. Ольга Валерьевна этэринэн дьаҥ кэлбит эрэ дьонтон буолбакка, ОРВИ-нан ыалдьан быраастарга көрдөрө кэлбит дьонтон эмиэ булуллубут. Онон өссө төгүл тоһоҕолоон этэр:
— Бэйэни хааччахтаныы эрэсиимин сымнатымаҥ, маҕаһыыҥҥа бэйэ бэйэҕититтэн тэйиччи туруҥ, таһырдьа кыһалҕата суох тахсымаҥ!
Билигин улахан үлэ ыалдьыбыт дьону кытта алтыспыт дьону булууга ыытылла турар. Ол түмүгүнэн, холобур, Перинатальнай киин үлэһитэ булуллубут. Онон санация үлэтэ ыытыллыбыт. “Сорох ыарыһахтар хантаактаспыт дьоннорун кистии сатыыллар, бу маннык түгэннэргэ полиция үлэһиттэрин кытта тэҥҥэ үлэлииргэ күһэллэбит”, — диэн эттэ. Араас урут буолбатах киһини соһутар түгэннэрэ баалларын кэпсээтэ. Соторутааҕыта төрөөбүт дьахтар КОВИД-19 ыалдьыбыт киһини кытта хантаактаспыта биллэн анаалыстаммыт. Анаалыһа ыарыы баарын биллэрбитин таһынан, оҕото эмиэ сыстыбыт. Ону билэн да баран, дьахтар эмтэнэртэн аккаастамыт. Ону быраастары кытта ааттаһа сатаан баран, прокуратура үлэһиттэрин нөҥүө дьайан эрэ күһэйбиттэр.
Саамай уустук балаһыанньа билигин Алдан куоракка. Онно ыарыы тарҕатыан сөптөөх дьону булуу күүскэ ыытыллыбыт, хантаактаспыт дьон бары дьиэлэригэр олороллор. Алдан куорат былаастара ырыынакка алтыспыт дьону кытта үлэни ыыта сылдьаллар, куоракка харантыын кытаанах эрэсиимэ олохтоммут.
Егор Карпов, edersaas.ru