СӨ Үөрэҕи кэтээн көрөр уонна хонтуруоллуур киин иһитиннэрэринэн, быйыл нуучча тылыгар биир кэлим эксээмэҥҥэ 22 оҕо 100 баалы ылбыт.
Тустаах киин суруйарынан, бу Алдан, Амма, Ленскэй, Өлүөхүмэ, Таатта, Уус Алдан, Хаҥалас, Мииринэй, Нерюнгри улуустарын уонна биллэн турар, Дьокуускай куорат оскуолаларын үөрэнээччилэрэ.
Нуучча тылыгар эксээмэни сүрүн түһүмэххэ быйыл 7826 киһи туттарбыт. Көрдөрүү ааспыт сыллааҕы курдук. Үрдүк 96-98 баалы – 136, 90-96 баалы – 405 үөрэнээччи ылбыт. Эксээмэни кыайан ааспатах киһи ахсаана 0,9 % тэҥнэспит. Тэрийээччилэр этэллэринэн, ити ааспыт сыллааҕы көрдөрүү курдук. Онон иннибит диэки сыҕарыйыы суох диэн бэлиэтиэх тустаахпыт. Дьиҥэр, үөрэнээччилэр 24 баалы ыллылар да, аттестаты сиэптэригэр уктар кыахтаахтар этэ.
Эксээмэҥҥэ фонетика, лексика уонна фразеология, тылы үөскэтии уонна синтаксис салааларыттан сорудахтар бэриллибиттэр.
Виктор ЭВЕРСТОВ хаартыскаҕа түһэриитэ.