А.С.Пушкин аатынан Нуучча академическай тыйаатыра балаҕан ыйыгар гостуруолга Нерюнгрига, онтон Алдаҥҥа уонна Аллараа Кураанахха бараары бэлэмнэнэр.
edersaas.ru
Ол иннинэ атырдьах ыйын 27 күнүгэр “Тетки” диэн кэмиэдьийэ-испэктээги Дьокуускай куорат олохтоохторугар уонна ыалдьыттарыгар көрдөрүөҕэ.
Билиэт атыытыттан киирбит үбү барытын Кэбээйи уонна Дьааҥы улуустарыгар ууттан эмсэҕэлээбиттэргэ көмөҕө ыытыахтара.
Дьиҥэр, тыйаатыр быйылгы 132-с сезонун балаҕан ыйын 2 күнүгэр, үгэс курдук, “Барышня-крестьянка” испэктээгинэн саҕалыыр.
“Эһиги, көрөөччүлэр баар буолаҥҥыт, көрөөччүлэр элбэхтик сылдьар тыйаатырдарынан өрөспүүбүлүкэҕэ хаһыс да сылын ааттанныбыт. Биһиги куруук бастакынан тыйаатыр саҥа сезонун саҕалыыбыт”, — диэн, тыйаатыр салалтата ууга эмсэҕэлээбиттэргэ көмөлөһөөрү “Тетки” диэн испэктээги анаан көрдөрөллөрүгэр көрөөччүлэрин ыҥырар.
Надежда ЕГОРОВА, «Саха сирэ», edersaas.ru