Маны аах Үөрэх уонна наука

Нуучча литературатыгар БКЭ-ни — 100 баалга

Нуучча литературатын биридимиэтигэр биир кэлим эксээмэн (ЕГЭ)  түмүгүнэн Дьокуускай куорат оскуолаларын түөрт выпускнига  100 баалга туттардылар.

Ситиһиилээх оскуоланы бүтэрээччи оҕолор уонна кинилэри үөрэппит, такайбыт учууталларын истиҥник эҕэрдэлиибит! Оҕолор нуучча литературатын таптыыллара, элбэҕи ааҕаллара, олимпиадаларга ситиһиилээхтик кыттыбыттара  — барыта биир кэлим эксээмэни 100 баалга туттарбыттара туоһулуур. Оҕолор ситиһиилээхтик туттарбыттара — бу учуутал дьаныардаах, кыһамньылаах үлэтиттэн тахсара саарбаҕа суох. Дьокуускайдааҕы 23-с  нүөмэрдээх оскуола социальнай, гуманитарнай хайысхалаах кылааһын икки үөрэнээччитэ БКЭ-ни  100-түү баалга ситиһиилээхтик туттарбыттара, нуучча тылыгар уонна литературатыгар үөрэппит учууталларын туһунан элбэҕи этэр.

Нуучча литературатыгар БКЭ-ни 100 баалга туттарбыт оҕолор уонна кинилэр учууталлара:

Иванов Владислав — А.Г. уонна  Н.К.Чиряевтар ааттарынан Саха национальнай гимназиятын 11 «а» кылааһын үөрэнээччитэ.

Владислав нуучча литературатыгар Бүтүн Арассыыйатааҕы үөрэнээччилэр олимпиадаларын муниципальнай сүһүөҕэр хас да төгүллээх призера,  үөрэнээччилэр хотугулуу-илиҥҥи олимпиадаларын уонна үрдүк үөрэхтэр кыһаларын икки ардыларынааҕы эрэгийиэннээҕи аһаҕас үрдүк үөрэхтэр литератураҕа олимпиадаларын  призера, быйылгы үөрэх дьылыгар ыытыллыбыт Бүтүн Арассыыйатааҕы психология олимпиадатын призера, 2018 с. ыытыллыбыт ХИФУ араатардарын күрэҕин кыайыылааҕа.

 

 

Кылааһын салайааччыта уонна нуучча тылыгар, литературатыгар үөрэппит, дьарыктаабыт учуутала   Фёдорова Татьяна Николаевна

Постникова Дайаана,  Сэбиэскэй сойуус Дьоруойа Ф.К.Попов аатынан Дьокуускайдааҕы 20-с нүөмэрдээх орто оскуола  11 «б» кылааһын бүтэрээччи. Дайаана — үөрэх туйгуна, хас да биридимиэккэ Бүтүн Арассыыйатааҕы үөрэнээччилэр олимпиаларын призера: 2019 с.  нуучча литературатыгар, 2019 с. английскай тылга, 2020 с. нуучча тылыгар.  2020 с. UWC аан дойдутааҕы колледж Бүтүн Арассыыйатааҕы сүүмэрдээһинин финалиһа, 2021 с. английскайдыы тыл этии күрэҕин 1 истиэпэннээх дипломана,  «K-POP COVER DANCE» үҥкүү хайысхатыгар Уһук Илиҥҥи күрэҕин финалиһа.

 

Дайаананы нуучча тылыгар уонна литературатыгар үөрэппит учуутала Ильинова Саргылана Николаевна.

Сутакова Анжелика — Дьокуускайдааҕы В.И. Малышкин аатынан 23-с нүөмэрдээх орто оскуола социальнай гуманитарнай хайысхалаах 11″а»кылааһын үөрэнээччитэ.

Анжелика 2016 сыллаахтан Бүтүн Арассыыйатааҕы үөрэнээччилэр олимпиадаларын хас да төгүллээх кыайыылааҕа, призера. Нуучча тылыгар, литературатыгар, английскай тылга уонна уопсастыбаны  билии биридимиэттэригэр ситиһиилээхтик кыттыбыта. 

Хлынова Алла — В.И. Малышкин аатынан Дьокуускай куорат 23-с нүөмэрдээх орто оскуола социальнай, гуманитарнай хайысхалаах 11 «а» кылааһын үөрэнээччитэ.

Алла 2020, 2021 сылларга литератураҕа Бүтүн Арассыыйатааҕы үөрэнээччилэр олимпиадаларын эрэгийиэннээҕи түһүмэхтэрин кыайыылааҕа,  2020 с. Бүтүн Арассыыйатааҕы үөрэнээччилэр олимпиадаларын түмүктүүр түһүмэххэ ыҥырыллыбыта.  Бүтүн Арассыыйатааҕы үөрэнээччилэр олимпиадаларын муниципальнай түһүмэхтэригэр 2020 с. английскай тылга, 2019 с. нуучча тылыгар призердаабыта. Тыл үөрэҕэр үөрэнээччилэр хотугу илиҥҥи олимпиадаларын 2019 с. призера. 2021 с.  ыытыллыбыт «Тотальнай дьыктааны» туйгун сыанаҕа суруйбута.

 

Сутакова Анжеликаны уонна Хлынова Алланы нуучча тылыгар уонна литературатыгар үөрэппит учууталлара Белых Анна Афанасьевна.

Бары үөрэнээччилэри уонна кинилэр учууталларын истиҥник эҕэрдэлиибит! Оскуоланы бүтэрээччилэр литератураҕа тапталлара уҕараабакка, талбыт үөрэхтэригэр ситиһиилээхтик туттарсан киирэллэригэр баҕарабыт. Эһиги — үүнэр көлүөнэҕэ үтүө холобур буолаҕыт.

 

edersaas.ru

 

 

0
0