Чэпчэки ыйааһыҥҥа UFC чөмпүйүөнэ Хабиб Нурмагомедов боксаҕа аан дойду чөмпүйүөнэ Флойд Мейвезеры кытта күөн көрсөрө, бастатан туран, киниэхэ барыстаах буолуоҕун эттэ. Бу туһунан Submission Radio иһитиннэрдэ.
Хабиб Нурмагомедов утарылаһааччыта билигин сааһырбытын, 41-42-тэ буолбутун эттэ, онон кинини кытта күөн көрсөрүм миэхэ – мин нэһилиэстибэбэр, үппэр-харчыбар, фанаттарбар — бары өттүнэн барыстаах быһаарыынан буолуо этэ диэтэ.
Билиҥҥитэ хотторуу хомолтото диэн тугун билэ илик боксаҕа аан дойду чөмпүйүөнэ Флойд Мейвезер 2017 сыл атырдьах ыйыгар Конор Макгрегоры кытта бокса быраабылатынан киирсэн кыайан турар. Соторутааҕыта Мейвезер ирландец туох буолуоҕун толору амсайан турар, билигин аны Хабиб элбэҕи саҥаран эрэр диэтэ, уонна UFC чөмпүйүөнэ Хабиб Нурмагомедовы кытта эмиэ бокса быраабылатынан киирсэргэ бэлэмин эттэ.
Бу иннинэ американец Флойд Мейвезер уонна Хабиб Нурмагомедов күөн көрсүһүүлэрэ 2019 сыл ыам ыйын 4 күнүгэр Грознайга буолуон сөбүн туһунан иһитиннэриллибитэ.
Роман ПОПОВ, «Саха сирэ» хаһыат, edersaas.ru
Хаартыска интэриниэттэн ылылынна