Лас-Вегаска (АХШ, Невада штат) күөн көрсүүгэ UFC 229 турнира түмүктэннэ. Онно сыл сүрүн охсуһуутунан ааттаммыт киирсиигэ Хабиб Нурмагомедов уонна Конор Макгрегор утарыта таҕыстылар.
Нурмагомедов киирсии хара саҕаланыаҕыттан ирландецка үөс-батааскы биэрбэккэ, кимиилээхтик кииристэ. Уонна төрдүс түһүмэххэ охторон түһэрэн тыынын хаайан, утарылаһааччытын бэриннэрдэ.
Тыҥааһыннаах киирсии бүппүтүн кэнниттэн, түһүлгэ таһыгар ирландец уонна дагестанец хамаандаларын бэрэстэбиитэллэрэ кыттыылаах охсуһуу буолла. Онно Хабиб ойон тахсан Конор тириэньэрэ Дилон Дэнистиин дайбаста. Оттон Хабиб хамаандатыттан Зубайра Тухугов октагон иһигэр турбут Конорга саба түстэ. Бу кэнниттэн тэрийээччилэр, UFC бэрэсидьиэнэ Дэн Уайт быһаарыытынан, киирсии кыайыылааҕынан хайалара буолбутун иһитиннэрэртэн туттуннулар. Онон Нурмагомедовка чөмпүйүөн курун кэтэрдибэтилэр. Көннөрү Арассыыйаттан сылдьар ММА байыаһа чэпчэки ыйааһыҥҥа чөмпүйүөн аатын көмүскээтэ диэн буолла.
Итинэн Хабиб хотторуута суох кыайыытын ахсаанын 27-ҕэ тиэртэ. Оттон Конор бүгүн төрдүс хотторуутун сурунарга күһэлиннэ, бу иннинэ кини рингэттэн 21-дэ кыайыылаах тахсыбыта.
Роман Попов, edersaas.ru