Былырыын сандал саас салаллан кэлиитэ, биир үтүө күн Татта улууһун Э.К.Пекарскай аатынан Игидэй орто оскуолатын 3 кылааһын үөрэнээччилэригэр учууталбыт Александра Афанасьевна Захарова Сахабыт сиригэр бэлиэтэнэр Ньургуһун күнүн көрсө сүрдээх интэриэһинэй кылаас чааһын ыыппыта.
Онно кэпсээбитинэн, ньургуһун сибэкки барахсан тоҥ буору тоҕо анньан тахсан, тымныыттан, хаартан чаҕыйбакка саас маҥнай тахсар Сахабыт сирин биир кэрэ сибэккитэ буолар эбит.
Сир-дойду аайы араас дьуһуннээх буолар эбит. Ол курдук, Бүлүү өрүс эҥэр, Муома диэки күөхтүҥү, фиолетовай өҥнөөх, киин улуустарга араҕас, маҥан буолар эбит. Хоту диэки кытархай дьүһүннээхтэр эмиэ бааллар. Ньургуһуну харыстааннар «Кыһыл кинигэҕэ» киллэрбиттэр. Биһиэхэ манна араҕас дьүһүннээхтэр үүнэллэр, күн бытархайын курдуктар. Алаас саҕатыгар, халдьаайы сыырыгар күн көрөр сиригэр сөбүлээн тахсаллар.
Кылаас чааһын кэнниттэн оскуола психолога, биһиги кылаас төрөппүтэ Ольга Спартаковна Дьяконова буолан бары сиэттиспитинэн сахалыы танаспытын кэтэн, кыра өйүө ылан, оскуолаттан чугас олорор үлэ бэтэрээнэ Виктор Филиппович Марков олбуоругар үөрэ-көтө ньургуһун көрө, хаартыскаҕа түһэ тахсыбыппыт. Соһуйуохпут иһин, олбуор иһэ ап-араҕас көбүөр сытарын курдук ньургуһун бөҕөтө үүммүт этэ. Бары сэрэнэн киирэн хаартыскаҕа түспүппүт, кэрэ нарын сибэккилэр быыстарыгар кэпсэтэ-ипсэтэ аһаабыппыт.
Бүгүн эмискэ Ньургуһун күнүгэр дьиэҕэ үөрэнэ олорон ол кэми наһаа астыктык ахтан-санаан ыллым. Сахабыт сирин кэрэ, нарын ньургуһунун курдук бары үтүөҕэ, үрдүккэ талаһыаххайыҥ, тулуурдаах, күүстээх буолуоххайыҥ!
edersaas.ru саайтка анаан
Игидэй оскуолатын
төрдүс кылааһын үөрэнээччитэ
Айхал Кривошапкин.