Соторутааҕыта Баку куоракка саха норуодунай бэйиэтэ Наталья Харлампьева “Доҕорум муус устар” хоһооннорун кинигэтэ азербайджан тылынан тахсыбытын сүрэхтээһин уонна суруйааччылыын истиҥ көрсүһүүлэр буолбуттарын иһитиннэрбиппит.
Бэйиэт, издатель, уопсастыбаннай диэйэтэл, Түүр эдэр суруйааччыларын аан дойдутааҕы холбоһуктарын салайааччы Экбер Гошалы ыҥырыытынан Наталья Ивановна Ататюрк киин тэрийэн ыытар Поэзия бырааһынньыгар бочуоттаах ыалдьыт буолла.
Бакуга Наталья Харлампьева Былатыан Ойуунускай “Кыһыл Ойуун” бэйиэмэтин тылбааһын бүтэрэн эрэр биллиилээх суруналыыс Аида Эйвазованы көрүстэ, сүбэ-ама биэрдэ. Аида Эйвазова бэлэмнии сылдьар кинигэтигэр Ойуунускай “Александр Македонскай” уонна “Улуу Кудаҥса” биллэр-көстөр айымньылара эмиэ киирэллэр эбит.
Маны таһынан, өссө биир үчүгэй сонун – биллиилээх тюрколог-учуонай, филологическай наука дуоктара, Бакутааҕы судаарыстыбаннай педагогическай университет профессора, литературовед, публицист уонна тылбаасчыт Рамиз Аскер бэйэтин баҕа өттүнэн саха норуотун эпоһын – Былатыан Ойуунускай “Дьулуруйар Ньургун Боотур” олоҥхотун азербайджан тылыгар тылбаастыырга быһаарыммыт.
Учуонай бу иннинэ узбектар поэзияларын антологиятын, татаар поэзиятын классигын Тукаайы, казахтар, туркменнар поэзияларын, туроктар мифологияларын, о.д.а. айымньылары ситиһиилээхтик тылбаастаабыта биллэр.
Татьяна МАРКОВА, edersaas.ru