Ньургуйаана Владимирова : «Коронавирус «дельта» көрүҥэ билигин даҕаны тарҕана турар!»
Дьокуускайдааҕы килиниичэскэй балыыһа кылаабынай бырааһын солбуйааччы Ньургуйаана Анатольевна Владимирова нэһилиэнньэҕэ сыыһа өйдөбүл тарҕамматын туһуттан сэрэтэр:
-Өрөспүүбүлүкэ сорох олохтоохторугар “омикрон” дьайыыта чэпчэки диэн сыыһа өйдөбүл тарҕанан эрэр. Оттон “дельта”-штамм билигин даҕаны баар, элбэх киһини сутуйар. Холобур, Роспотребнадзор иһитиннэрбитинэн, Дьокуускай куоракка ыарыы 20% коронавирус “дельта” көрүҥүнэн көбөн тахсыбыт. Оттон улуустарга бу сыыппара 40% кэриҥэ буолар. Килиниичэскэй балыыһаҕа күннэтэ ыарахан туруктаах ыарыһахтар Саха сирин араас улуустарыттан киирэ тураллар. Бүгүҥҥү күн туругунан 379 ыарыһах COVID-19 ыарыыттан эмтэнэ сытар. Балыыһаҕа сытар ыарыһахтар ортолоругар оҕолоноору сылдьар 45 дьахтар баар. Реанимацияҕа 27 киһи сытар, олортон түөрт киһи ИВЛ аппараатыгар холбонон сытар.
«Саха сирэ» хаһыат, edersaas.ru
Хаартыска sakha.gov.ru