Ньургуйаана Никифорова аан дойду чөмпүйэнээтигэр бэлэмнэнэр

Ааптар: 
Бөлөххө киир:

Бэс ыйын 6-13 күннэригэр Будапешт куоракка дзюдоҕа Аан дойду чөмпүйэнээтэ ыытыллар.

Манна биир дойдулаахпыт Ньургуйаана Никифорова Арассыыйа чиэһин көмүскүүр. Бэлиэтээн эттэххэ, аан дойду таһымыгар бүтүн Уһук Илин эрэгийиэниттэн, дзюдоҕа улахан дьон түһүлгэтигэр өссө ким даҕаны кытта илигэ. Ньургуйаана Москва уобалаһыгар Парамонов аатынан үөрэтэр-эрчиллэр базаҕа бэҕэһээҥҥиттэн  дьаныардаах дьарыгын саҕалаата.

Спортсменканы эрчийэр тус тириэньэрин Дамдиндорж Гомбодоржы кытары сибээстэстибит:
— Ньургуйаана Никифорова дзюдонан 2009 сылтан дьарыктанар. Птицефабрика оройуонугар 12 №-дээх оскуолаҕа тириэньэр уопсастыбанньык Валерий Герасимовка дьарыктанан саҕалаабыта. 2010 сыл тохсунньутугар, каникул кэмигэр, Олимпийскай эрэллэри бэлэмниир училищеҕа икки нэдиэлэлээх кыһыҥҥы сүүмэрдээһин буолбута. Барыта отучча оҕо баарыттан кинини бэлиэтии көрбүппүт. Онно тыыппалааҕын сэрэйэн болҕомтоҕо ылбыт эбиппин. Училище ахсыс кылааһыгар үөрэнэ кэлбитэ. Онтон ыла ылсан дьарыктанар. Дзюдонан 2010 сылтан дьарыктаммыта уонна номнуо үһүс сылыгар, 2013 сыллаахха олунньуга Волгоградка 18-гар диэри саастаах уолаттар уонна кыргыттар Арассыыйаҕа бастыыр иһин күрэхтэһиилэригэр финалга тахсыбыта. Онно аан бастаан Арассыыйа сүүмэрдэммит хамаандатыгар киирбитэ. Улахан успуорка карьерата оннук саҕаламмыта. Онтон 2015 с. Удмуртияҕа Ижевскэйгэ юниордарга бастыыр иһин күрэхтэһиигэ үрүҥ көмүс мэтээли ылары ситиспитэ. Ростов куоракка ыытыллыбыт 23-гэр диэри саастаахтарга Арассыыйаҕа бастыыр иһин күрэхтэһиигэ икки төгүл чөмпүйүөннээбитэ.  Улахан дьоҥҥо 2019 с. Ингушетияҕа Назрань куоракка Арассыыйа чөмпүйэнээтигэр  кыайбыта. Аан дойду таһымыгар «Гран при» сиэрийэлээх турнирга  иккитэ мэтээл ылбыта. Бу бэҕэһээҥҥиттэн, чөмпүйэнээт буолуор диэри, Москва уобалаһыгар баар Парамонов аатынан үөрэтэр-эрчиллэр баазаҕа киирэн бэлэмнэнэн эрэр. Хамаанданы кытары анал тириэньэрдэр састааптара үлэлиир. Буола турар пандемиянан тус тириэньэрдэри, хомойуох иһин, киллэрбэттэр. Ньургуйаана чөмпүйэнээккэ кыттыыта бэйэтигэр даҕаны, миэхэ даҕаны улахан соһуччу буолла. Бэлэмнэнии күүскэ барар. Кыыспыт санаата бөҕө, киирсэргэ бэлэм.

Кини киһи быһыытынан сүрдээх үчүгэй. Улахан маладьыас. Арассыыйа сүүмэрдэммит хамаандатыгар киирбитэ тохсус сылыгар барда. Бу сыллар тухары дьулуурдаахтык дьарыктанар. Ньургуйаана Никифорова —  мин улахан киэн туттуум.Тоҕо диэтэххэ, кини улахан дьоҥҥо Арассыыйа чөмпүйэнээтигэр кыайбыт бастакы уонна соҕотох үөрэнээччим. Ньургуйаана өссө 2019 сыллаахха бэйэтин көрдөрөн, Саха сириттэн, ону ааһан бүтүн Уһук Илин эрэгийиэниттэн, Арассыыйа 11 эрэгийиэниттэн сүүмэрдэммит бастыҥ спортсменнар ахсааннарыгар киирбитэ. Бастыҥнар кэккэлэригэр аата ааттанарыттан, ситиһиилэриттэн, кыайыыларыттан олус үөрэбин уонна киэн туттабын. Быйыл буолаары турар улахан дьон күрэхтэһиитигэр, Уһук Илинтэн, төрөөбүт Сахатын сириттэн дойду сүүмэрдэммит хамаандатыгар соҕотоҕун киирдэ. Онон бука бары эрэнэ кэтэһэбит, Ньургуйаанабыт туһугар ыалдьабыт!

Хаартыскалар интэриниэт ситимиттэн ылылыннылар

+1
0
+1
0
+1
0
+1
0
+1
0
+1
0
+1
0