Сунтаардааҕы “Ньургуһун” түмсүү айар куттаахтары түмэн, бу кэлиҥҥи кэмҥэ элбэх айымньыны күн сиригэр көрдөрдө.
edersaas.ru
Ааспыт ый саҥата биир дойдулаахтарбыт, суруйааччылар – Кутанаттан Валентина Дьячковская -Хара Көмүс, Тойбохойтон Анатолий Данилов -Аман СӨ суруйааччыларын сойууһун чилиэннэрэ буолуллар. Сунтаар дьоно кинилэр үөрүүлэрин бииргэ үллэстэбит уонна хомоҕой хоһооҥҥут, кэрэ кэпсээҥҥит элбэх ааҕааччылардаах буоллуннар!
Маны таһынан, олунньуга Олоҥхо дьиэтигэр 8 ааптар 12 кинигэтин сүрэхтээбиппит. Ол иһигэр, Аллыҥаттан Елена Антонова — Күн Сиккиэрэ “Дьон айымньытынан санааларым”, “Сибэкки ыһыаҕа”, Кутанаттан Валентина Дьячковская — Хара көмүс “Оо, арай”, “Кун уотун сылааһа”, Күүкэйтэн Екатерина Львова -Долгууна “Көмүс долгуннар”, “Олох дьоло”, Кутанаттан З.И.Игнатьева -Сыралы “Санаам иэйиитэ”, “Бэлэх”, Руслан Ксенофонтов “Ыра санаам ырыа буолан”, Тойбохойтон Вера Уарова “Сырдык сулус буолан…”, Бордоҥтон Александр Алексеев “Олоҕу хайдах баарынан”. Оттон муус устарга “Ньургуһун” түмсүү “Ыра санаа” диэн оҕолорго аналлаах остуоруйалар, кэпсээннэр хомурунньуктара таҕыста (Мария Данилова – Күн Мичээрэ, Екатерина Коротова – Кэтии Лэчил, Дина Николаева, Зинаида Васильева – Сыралы, Валентина Дьячковская – Хара Көмүс, Любовь Понохова — Тумара, Елена Иванова – Хатыы, Вера Уарова, Светлана Контогорова, Изабелла Макарова — Толоон Туорааҕа, Трофим Егоров – Тирэҕэ, Розалия Николаева – Уйулҕаана айымньылара киирдилэр), ону таһынан, Тойбохойтон Анатолий Данилов – Аман “Туос сыта”, Сунтаартан Александр Оконешников “Мин ыллыыр түгэним”, Күндэйэттэн Аркадий Тимофеев – Күн Дэлэй “Ийэм чэрдээх ытыһа”, Кэмпэндээйиттэн Николай Герасимов – Дьээбэ Тойон “Сүрэҕим сылааһа” кинигэлэр күн сирин көрдүлэр. Онтон кэнники кинигэлээх эр хоһууттарбыт биирдии хоһооннорун күндү ааҕааччыларбытыгар быһа тардан сүрэхтиибит.
Мария КОБЕЛЬЯНОВА-ТУСКУЛААНА, Сунтаар, edersaas.ru сайтка анаан
Анатолий Данилов – Аман
“Доҕотторбор”
Оо, доҕотторум
Бары ханна сүттүгүт?
Суохтаан соҥуордум,
Хоһоон анаан суруйдум,
Эһигини хоһуйдум.
Александр Оконешников
“Нарын таптал”
Истиҥ, килбик мичээрдээх
Кэрэ куба сэгэрим.
Ахтар, таптыыр санааттан
Кистии-саба көрөргүн.
Чуҥкук, уһун түүннэргэ
Утуйбакка сытаҥҥын,
Сүрэх уотун сөҥүрдэн
Оргууй үөһэ тыынаргын.
Чуумпу хоһуҥ иһигэр
Соҕотоҕун олорон,
Ыраас таптал тылларын
Долгуйаҥҥын ыллыыргын.
Истэр миэнэ кулгааҕым,
Таайар миэнэ сүрэҕим,
Көрөр миэнэ хараҕым –
Нарын намчы тапталгын
Аркадий Тимофеев- Күн Дэлэй
“Сунтааргытын таптааҥ”
Сунтааргытын таптааҥ,
Суохтуу өрүү ааттааҥ,
Куруук кэлэ сылдьыҥ,
Кэскилигэр ыалдьыҥ.
Утумҥутун салҕааҥ,
Улуус аайы тарҕааҥ,
Ыраах сылдьан санааҥ,
Ырыаҕытын анааҥ.
Сахаҕытын өйдөөҥ,
Сайдыы суолун көрдөөҥ,
Сүүрүк өрө устуҥ,
Саҥа кэми тутуҥ!
Николай Герасимов — Дьээбэ Тойон.
“Саас кэллэ”
Сылаастык, сырдыктык сыдьаайа
Сахабыт сиригэр саас кэллэ,
Саҥалыы олоҕу салайа
Саҕахтан күн уота сандаарда.
Кийиит кыыс төрүүрүн кэтэһэ
Аймах дьон долгуйа күүтээччи,
Кыстык хаар уулларын көһүтэ
Айылҕам иһийэн турааччы.
Ааспыты таһаҕас гынымыах,
Хаалларыах бэйэтин кэмигэр.
Алҕаһы хатылаан төннүмүөх,
Хоргутуох, хомойуох түгэҥҥэр.
Кэмсинэр диэн тугун билбэккэ
Эдэрдии, эрчимнээх буолуохха,
Кэлэр кэм кэрэтин түстүөххэ,
Эйэни уруйдаан туойуохха
Хаартыска: интэриниэттэн.