«Ньургуһуннуун көрсүһүү» оҕолору түмэр, сомоҕолуур туһалаах тэрээһин

Бүгүн, ыам ыйын 11 күнүгэр, өрөспүүбүлүкэтээҕи лиссиэй 5-8 кылааһын үөрэнээччилэрэ сыл аайы үгэскэ кубулуйбут «Ньургуһуннуун көрсүһүү» диэн тэрээһиҥҥэ кытыннылар. Оҕолор учууталларын кытары айылҕаҕа тахсан эргиччи туһалаахтык сынньаннылар. Бу туһунан биһиэхэ лиссиэйгэ саха тылын уонна литературатын учууталынан үлэлиир Саргылаана Игнатьева иһитиннэрдэ.

—Тэрээһиммит «Ньургуһуну үргээмэ, ньургуһуну үктээмэ» диэн девиһинэн ыытыллар. Сыала-соруга, аата да этэрин курдук, тулалыыр эйгэни, кэрэ-мааны айылҕабытын харыстааһыҥҥа туһуланар. Аан бастаан бу тэрээһини лиссиэй биологияҕа учуутала Анна Егоровна Местникова көҕүлээбит, тэрийбит. Тутуспутунан аан бастаан айылҕаҕа тахсан сынньаныы, субуотунньуктааһын ыам ыйын 9 күнүгэр 2009 сыллаахтан саҕаламмыт, — диир Саргылаана Ивановна. — Онтон ыла иллээх кэлэктиип сыл ахсын Өлүөнэ эбэ кытылын бөхтөн-сахтан ыраастыыр үгэстээх. Куулларга хаалаабыппытын СӨ Айылҕа харыстабылын министиэристибэтэ тиэйэр, таһар, анал миэстэҕэ илдьэн тоҕор. Салгыы Табаҕа тумуһугар тахсан бу тэрээһиммит туһунан, сыллата хардыытын, үлэтин түмүгүн кэпсиибит, сырдатабыт.

Урукку өттүгэр учууталлар тэрийэн таһаарар эбит буоллахтарына, кэлиҥҥи сылларга кылаастар бырабыыталыстыбалара тэрийэллэр. Ол курдук, түөрт факультекка арахсаннар, оҕолор ньургуһун туһунан тугу билэллэрин кэпсииллэр. Сүүрүүлээх-көтүүлээх, хамсаныылаах оонньуулар ыытыллаллар. Быйылгы оонньууну Никифор Павлов, 5-8 гимназическай кылаастар президеннэрэ салайааччылаах бырабыыталыстыба тэрийдэ. Бу оонньууну оҕолор наһаа сөбүлээн, көхтөөхтүк кытталлар. Айылҕаҕа тахсыбыт дьон быһыытынан сибиэһэй салгынынан астына, дуоһуйа тыыналлар, көрү-күлүүнү, үөрүүнү-көтүүнү көҕүлүттэн туталлар, билиини хаҥатар оонньууларга үөрүүнэн кытталлар.

Уон сыл устатыгар тиһиктээхтик ыытыллар туһалаах тэрээһин үөрэнээччилэр саамай күүтэр бырааһынньыктарыттан биирдэстэрэ буолар. Маныаха быйылгы бэһистэр аан бастаан ыраах соҕус хаамыылаах сиргэ барсан, «сүрэхтэниини» бэркэ аастылар. Оҕолор бэйэлэрэ да улаханнык астынан, сэргэхсийэн, өрө көтөҕүллэн кэллилэр, — диэн Саргылаана Ивановна чахчы да үөрэн-көтөн сырдатта.

«Ньургуһуннуун көрсүһүү» тэрээһиҥҥэ уопсайа 51 үөрэнээччи кыттыбыт. Биология учуутала, сүрүн салайааччы Анна Егоровна Местниковаҕа, дириэктэри иитэр-үөрэтэр үлэҕэ солбуйар Лена Дмитриевна Федороваҕа, 5 кылаас салайааччыта Николай Иннокентьевич Захаровка, 6 кылаас салайааччыта Диана Алексеевна Сивцеваҕа, 7 кылаас салайааччыта Эрчимэн Дмитриевич Избековка, саха тылын уонна литературатын учуутала Саргылаана Ивановна Игнатьеваҕа, «Айылҕа ситимэ» бырайыагынан ыытыллар айаннарыгар куруук бииргэ сылдьар, тэрээһиннэргэ көхтөөхтүк кыттар төрөппүттэртэн биирдэстэрэ Анна Леонидовна Гаврильеваҕа күүтүүлээх тэрээһиҥҥэ кыттыбыт оҕолор  уонна кинилэр төрөппүттэрэ махталлара муҥура суох.

Сардаана БАСНАЕВА, «Саха сирэ» хаһыат, edersaas.ru 

Хаартыскалар: өрөспүүбүлүкэтээҕи лиссиэйтэн ылылыннылар