Бу күннэргэ Ньурбатааҕы айылҕа харыстабылын кэмитиэтигэр «Сокол» вездеход күлүүһүн улуус баһылыга Алексей Иннокентьев туттарда.
— Айылҕа харыстабыла төһө даҕаны судаарыстыбаннай боломуочуйа буолбутун иһин, тулалыыр эйгэбит, ойуурбут-салгыммыт, өрүстэрбит-үрэхтэрбит чөл туруктаах, ыраас буолуулара — барыбыт интэриэспит. Мантан дьоммут-сэргэбит доруобуйата уонна олоҕо тутулуктаах. Тулалыыр эйгэни харыстааһыҥҥа муниципальнай тус сыаллаах бырагыраама үлэлиир. Араас тэрээһиннэр ыытыллаллар, экология кэмитиэтин матырыйаалынай-тэхиньиичэскэй баазатын тупсарыыга көмөлөһөбүт. «Сокол» вездеходу бу бырагыраама чэрчитинэн ыллыбыт. Суол баарыттан-суоҕуттан тутулуга суох ханна баҕарар тиэрдэр кыахтаах. Бу тиэхиньикэ айылҕа харыстабылын кэмитиэтин үлэһиттэрэ хонтуруоллуур үлэлэригэр, экологическай мониториҥҥа уонна булт ресурсаларын харыстааһыҥҥа уонна чөлүгэр түһэриигэ ыытар үгүс өрүттээх үлэлэригэр улахан көмөлөөх буолуо диэн эрэнэбин, — диэн баһылык Алексей Иннокентьев инстаграмҥа тус страницатыгар суруйда.
edersaas.ru