Кэлэр сыл – Бөтүүк сыла. Манан сибээстээн, Ньурба куорат дьаһалтата “2017 сыл бэлиэтин — Бөтүүгү кытта хаартыскаҕа түс” диэн ааттаах куонкурус биллэрбит. Ньурба куорат олохтооҕо Людмила Григорьева сиэннэрин кытта, бу куонкуруска анаан Саҥа дьыллааҕы харыйа иннигэр бары бөтүүктээх олорор хаартыскалара Батсаап ситимигэр тарҕанна.
Кэлиҥҥи кэмҥэ чааһынай дьоҥҥо итиччэ элбэх бөтүүк баарын көрө иликпин. Аҥардас улахаттарын да иһин сэргии, сэҥээрэ көрдүм. Маны интэриэһиргээн, Людмила Георгиевнаны бэйэтин кытта кэпсэтэ сырыттым. “Быйыл, кулун тутар ыйга үлэбэр сарбыллыыга түбэһиэхпиттэн дьарыга суох курдук буолан хаалбытым. Ол иһин муус устар ыйтан кыралаан көтөрү иитиинэн дьарыктанан эрэбин. Ол иннинэ ыттаах, куоскалаах эрэ этибит. Хонуу куруппааскытын (перепелка), кус, хаас, саха кууруссатын, индоутка, башкирка уонна коза ылан ииттэн саҕалаатыбыт. Үлэтин быыһыгар аҕабыт, Кондратий Николаевич көмөлөһөр. Козабытын ыам ыйыгар ылбыппыт, оҕолоох. Үүтүн атыылыыбыт. Ити башкирка диэн кус бииһин ууһа. Икки ыйга 2 киилэттэн тахса улаатар. Онон эт сиэн абыранныбыт. Көтөрдөрбүт бары хотоҥҥо тураллар. Сылытар инфракраснай уонна көннөрү лаампалар холбонон тураллар. Хотоммут сылаас, бэйэбит испитигэр “офис” диэн ааттыыбыт. Бэтэринээртэн сурук ылан, аҕыйах күнтэн бэттэх маҕаһыыҥҥа хонуу куруппааскытын (перепелка) сымыытын туттаран эрэбит. Доруобуйаҕа туһалаах. Эмп оннугар итинэн эмтэниэххэ сөп. Аптека эмэ химия буоллаҕа дии. Сымыытын куораттан сакаастаан, бэйэм таһаартаабытым. Онон сахам дьоно көтөр иитиитинэн дьарыктаныан сөп эбит. Этэ минньигэһин ааһан иҥэмтэлээх. Арай, биһиэхэ, ньурбаҕа комбикорм, эбиэс эҥин булар уустук соҕус.
Ити сиэннэрбин кытта куонкуруска анаан хаартыскаҕа түспүтүм. Бөтүүктэр дьиэҕэ киирэн үөрүүлэрэ-көтүүлэрэ үксүү сылдьар. Хайыахтарай, “офистарыгар” таҕыстахтара дии. Сайын араас көтөр саҥатын, ырыатын-тойугун истэр олус интэриэһинэй буолар эбит. Нууччалыы эттэххэ, көтөр “фаната” буоллум”, – диэн кылгастык санаатын үллэһиннэ.
Үүнэн эрэр Бөтүүк сыла Людмила Георгиевна дьиэ кэргэнигэр дьолу, интэриэһинэй дьарыгар ситиһиини аҕаллын!
Людмила ПОПОВА, “Саха сирэ” хаһыат, https://edersaas.ru/