Бу күннэргэ Ньурба улууһун баһылыга Алексей Иннокентьев, кини көмөлөһөөччүтэ Владимир Прокопьев, улуус дьаһалтатын нэһилиэктэри кытта үлэҕэ отделын салайааччыта Лариса Николаева уонна улуустааҕы урбааны өйүүр киин үлэһитэ Константин Годорожа Ньурбачааҥҥа сылдьан, нэһилиэктэргэ бэриллэр ИМБТ («Иные межбюджетные трансферты») үбэ хайдах туһаныллыытын бэрэбиэркэлээтилэр.
Лазернай гравировканан Сидорова Мария Ивановна дьонтон сакаас ылан дьарыктанар.
Андреев Николай Николаевич «Стенд для регулировки ТНВД» ылан үлэлиир. Маннык аппараат Ньурба улууһугар соҕотох. Кини өҥөтүнэн туһанааччы элбэх, атын улуустартан, бэл диэтэр, ыраах Өймөкөөнтөн кэлэн оҥоттороллор эбит. Онон былаана киэҥ, Кытайтан саҥа аппараат сакаастаабыта кэлбит. Улуус баһылыга Алексей Иннокентьев Ньурбачаан агро-оскуолатын иһинэн үлэлиир коза ферматыгар сырытта.
Билигин барыта 34 коза баар. Дьоҥҥо коза оҕолорун атыылаабыттар. Агро-оскуола үлэһиттэрэ бородууксуйаны атыыга таһаарарга үлэлэһэ сылдьаллар. Козабыт ахсаана элбээн биир хотоҥҥо баппат буолан эрэллэр диэн үлэһиттэр эбии хотон тутуутун туруорсаллар.
Ньурба улууһун дьаһалтатын пресс-сулууспата.