Ньурбаҕа элбэх оҕолоох ыалларга 100 тыһыынча солкуобайдаах сэртипикээттэри туттардылар
Дьиэ кэргэн бигэ тирэхтээх буоларыгар судаарыстыба, өрөспүүбүлүкэ уонна оройуон салалтатын өттүттэн элбэх өйөбүл, көмө оҥоһуллар. Ол курдук, Ньурбаҕа “Дьиэ кэргэн хапытаала” сэртипикээти үөрүүлээх быһыыга-майгыга биэс ийэҕэ туттардылар.
Быйылгыттан өрөспүүбүлүкэҕэ бастакынан, Ньурба оройуонун баһылыга Алексей Иннокентьев көҕүлээһининэн, төрдүс уонна онтон кэлэр оҕотун оҕоломмут дьиэ кэргэҥҥэ, ийэлэргэ “Ньурба дьиэ кэргэнэ” диэн ааттаан, 100 000 солкуобай сууммалаах муниципальнай ийэ хапытаала олохтоммута. Билиҥҥи туругунан, бу хапытаалы 16 дьиэ кэргэн туһанан, улуус демографическай балаһыанньатын тупсарыыга үлэ бара турарын туоһулуур.
Бэҕэһээ, балаҕан ыйын 2 күнүгэр, төрдүс, бэһис, алтыс оҕолорун оҕоломмут Ираида Васильевна Ивановаҕа, Пелагея Афанасьевна Семеноваҕа, Мария Ефимовна Ивановаҕа, Анна Анатольевна Степановнаҕа, Антонина Анатольевна Ивановаҕа уонна Мария Иннокентьевна Сологонскаяҕа баһылык Алексей Иннокентьев эҕэрдэлээн туран сэртипикээттэри туттартаата.
Улуус баһылыга Алексей Иннокентьев: “Кырачааннар этэҥҥэ улааттынар, доруобай эрэ буоллуннар. Бу курдук саҥа дьон өссө кэлэ турдун, улуус өттүттэн элбэх оҕолоох ыалга болҕомто, өйөбүл өрүү баар буолуо”, — диэн эрэннэрдэ.
Түөрт оҕолоох Ираида Иванова: “Оройуонтан тустаах көмө оҥоһуллара элбэх оҕолоох ыалга улахан өйөбүл буолар. Бу харчыбытын биһиги олорор усулуобуйабытын тупсарыыга ыытыахпыт диэн былаанныыбыт. Түгэнинэн туһанан, Алексей Михайловичка улахан махталбытын тиэрдэбит. Элбэх оҕолоох ыалларга оройуон кыһалларын биллибит”, — диэн үөрүүтүн үллэстэр.
edersaas.ru саайтка анаан
Ньурбаттан Лена Петрова.
Хаартыска — ааптар тиксэриитэ.