Аан дойдуга коронавирус дьаҥа тарҕанан, дезинфекциялыыр, санитарнай үлэлэр тиһиктээхтик салҕаналлар. Маннык тэрээһиннэр Ньурбаҕа атыы-эргиэн кииннэригэр эмиэ ыытыллаллар.
Кулун тутартан саҥа быраабылалар, ирдэбиллэр киллэриллиэхтэриттэн, балары толорууну биэдэмистибэлэр икки ардыларынааҕы хамыыһыйа көрөр, хонтуруоллуур. Хамыыһыйаҕа роспотребнадзортан, оройуон административнай хамыыһыйатыттан, Ньурба куорат дьаһалтатыттан, полицияттан, уопсастыбаннастан бэрэстэбиитэллэр киирбиттэрин туһунан sakha.gov.ru суруллар.
Ньурбаҕа улуус баһылыгын дьаһалынан урбаанньыттары өйүүр кииҥҥэ куорат бары атыы-эргиэн тэрилтэлэринэн эриэйдэлэри оҥорорго сорудах бэриллибит. Бастакы эриэйдэ кэнниттэн түмүк таһаарыллыбыт. Онно «Рассвет», «Пятерка», «Изабелла»маҕаһыыннарга, «Махтал», «Хозмаркет», «Ника» атыы-эргиэн дьиэлэригэр каассаларга дьаҥтан харыстыыр экраннар туруоруллубуттара ыйыллыбыт. Атыылаһааччылар бэйэлэрин икки ардыларыгар тутуһуохтаах дистанциялара муостаҕа бэлиэтэммит. Дезинфекцияны оҥорууга эппиэтинэстээхтэр бирикээстэринэн сыһыарыллыбыттар. Атыылаһааччылар киирээт да, тута, илиилэрин соттоллоругар, сууналларыгар дезсириэстибэлэр ууруллубуттар. Суунар, дезинфекциялыыр сириэстибэлэр, мааскалар, бэрчээккилэр саппааска бааллар. Роспотребнадзор сүбэтинэн, маҕаһыыннар дезинфекциялааһыны уонна салгылатыыны иккилии чаас буола-буола хатылыыллар диэн ыйыллыбыт.
Маҕаһыынтан атыылаһарга куттанар, долгуйар дьоҥҥо туһаайан, манна эмиэ биһиги курдук куорат олохтоохторо, оҕолорун, сиэннэрин, бииргэ төрөөбүттэрин, чугас дьоннорун доруобуйаларын туһугар эмиэ улаханнык долгуйар дьон үлэлииллэр диэбиттэр. Ол иһин, кинилэр үлэлиир сирдэригэр барыта этэҥҥэ буоларын, бэйэлэрин уонна эһиги доруобуйаҕытыгар куттал суоһаабатын туһугар бары кыһамньыларын уураллар диэн тоһоҕолоон эппиттэр.
Ону таһынан, Ньурба урбаанньыттара коронавирус дьаҥын бохсон, утаран, өссө төгүл көмөлөрүн оҥорбуттар. Бу сырыыга коронавирустаабыт дьон эмтэнэ сытар отделениеларыгар көмөлөспүттэр. Улуус суһал ыстааба эрэсиим биллэриллиэҕиттэн, кытаанах үлэни ыытта,»оборонаны» туппут. Бастакы күнтэн ураты эрэсиимҥэ урбаанньыттар үлэлээбиттэрэ бэлиэтэммит. Кинилэр кыһамньыларынан, сыраларынан, муус хамсыыр да кэмигэр, сибиэһэй уонна хаачыстыбалаах аһынан-үөлүнэн, күн ахсын туһаныллар табаарынан, дьаҥы бохсор дезинфекциялыыр сириэстибэлэринэн, уо.д.а. наадалаах малынан-салынан хааччыллыы биир да күн тохтообокко салҕаммыт. Биисинэскэ элбэх эйгэ үлэтэ бобуллубут, тохтотуллубут эрээри, кинилэр кыһалҕалаахтарга көмөнү, өйөбүлү оҥорор суолу тобулбуттар.
Бу сырыыга коронавиурс дьаҥын утары охсуһар отделениеҕа кэнсэлээрийэ табаардарыттан саҕалаан, түннүккэ туттуллар матырыйаалга, мэдиссиинэ ачыкытыттан кулерга тиийэ көмөлөспүттэр. Өрүү спонсордыыр тэрилтэлэр, куорат, улуус элбэх аахсыйаларын, тэрээһиннэрин меценаттара: «Баай УУ» (сал. Валерий Харламов) фирма, ИП Титова Зоя Васильевна (паром), «Масстрой» ХЭУо (сал. Владислав Торохов), «Мария» ТД (сал. Эльвира Петрова), «СМУ» ХЭУо — гааһынан саппараапкалыыр сир уонна «Механик» СТО (сал. Павел Потапов), «Татыйыына» Ньурбатааҕы филиала (сал. Андрей Васильев), «Раймаг» фирма (сал. Артем Николаев), «Чистодом» маҕаһыын (сал. Светлана Соловьева), «Ника» хозмаркет (сал. Анжела Никифорова), «Ньурба типографията» ХЭУо (сал. Елизавета Анисимова), «Грейс» кафе (сал. Аида Андреева), «Туймаада» ТД (сал. Анатолий Степанов) көмөлөспүттэригэр махтаммыттар.
Маны сэргэ, «Мария» уонна «Туймаада» атыы-эргиэн дьиэлэригэр үлэлиир Аняҕа (Чэн Айюн) уонна Сашаҕа (Чэнь Цзяньфу) махталларын тиэрдибиттэр. Бу иллээх дьиэ кэргэн Ньурбаҕа олорбута уонна үлэлээбитэ 20 сыл буолбут. Бэс ыйын 13 күнүгэр кинилэр оройуон суһал ыстаабыгар 3000 биирдэ кэтиллэр мэдиссиинэ мааскаларын аҕалбыттар. Бу мааскалар Ньурба куоратыгар олорор кыһалҕалаахтарга уонна элбэх оҕолоохторго түҥэтиллиэхтэрэ диэн ыйыллыбыт. Маны сэргэ, 2000-ны эбии «Туймаада» атыы-эригэн дьиэтигэр сылдьар дьоҥҥо анаан биэрэргэ быһаарбыттар. Урбаанньыттарга өссө төгүл үтүө санааларын, кыһамньыларын иһин махталларын тиэрдибиттэр. Оттон дьаҥнаабыттар түргэнник үтүөрэллэригэр баҕарбыттар.