Икки ый кэриҥэ халлаантан таммах уу түспэккэ гынан баран, дьэ, ардаан эрэр. Дьиҥэр, ардаҕар да барыахтаах этэ, атырдьах ыйын ортото.
Бу ааспыт өрөбүллэргэ Бүлүү федеральнай суолга Ньурба уонна Үөһээ Бүлүү икки ардыгар эмискэ элбэх ардах түһэн, сырыы харгыстана сырытта. 754-с – 772-с км учаастакка суол балаһатын оҥорууга хапытаалынай өрөмүөн бара турар. Ол иһин күүстээх ардах түстэҕинэ, бадараан буолан, тимир көлөлөөхтөрү эрэйдиир.
Бүлүү суолун управлениета иһитиннэрбитинэн, бэҕэһээ өрөмүөннээччилэр мөлтөх сири көннөрөн биэрэн, сырыы этэҥҥэ аһылынна. Ити этиллибит учаастак быйыл алтынньы бүтүүтүгэр диэри барыта аспаалланыахтаах. Тустаах тэрилтэ салалтата учаастакка улахан өрөмүөн бара турарынан анал тиэхиньикэлэр уонна үлэ хаамыыта мэһэйдиирин айаннааччылар өйдүүллэригэр көрдөһөр. Ыйытыылаах буоллаххытына, 8 (4112) 44-10-78, 8-924-593-80-28 диэн нүөмэрдэргэ эрийэн билсиэххитин сөп.