Ньурба улууһун дьаһалтатын салатата бу күннэргэ Маалыкай эҥэр нэһилиэктэргэ үлэлээтэ.
edersaas.ru
Улуустааҕы дьаһалта пресс-сулууспата иһитиннэрбитинэн, улуус баһылыга Алексей Иннокентьев салайааччылаах оробуочай бөлөх сырыытын сүрүн соруга — нэһилиэктэр мелиорация боппуруостарыгар туруорсар сирдэрин миэстэтигэр тиийэн көрүү-истии.
Чуукаардар эбэлэригэр уу хаайаары — быһыт, малдьаҕардар Талаҥда систиэмэтигэр оттуур сири нүөлсүтээри эмиэ быһыт оҥорторорго туруорсаллар. Хатыыга эмиэ Эбэлэригэр уу киллэртэрээри үрэх уутун хаайар быһыт астарар баҕалаахтар. Улуус салайааччылара нэһилиэктэргэ тиийэн балаһыанньаны олохтоохтук билистилэр.
Улуус баһылыга кэлэн иһэн Маалыкайга Степан Васильев аатынан сылгы собуотун үлэтин сыһыаннаах мунньаҕы салайан ыытта. Хаһаайыстыба, сайын ортото буолла да, үчүгэйдик оттообокко олорор, баара-суоҕа 70 т оттоохтор. Хайдах гынан үлэни тэрийэн, күүстээх хонтуруолга ылан хаһаайыстыбаны оттотор туһунан олохтоох кэпсэтии барда.
Малдьаҕар нэһилиэгэр Маалыкай куустарын баһылыктара, тыа хаһаайыстыбатын исписэлиистэрэ уонна землеустроителлэр кыттыылаах мелиорация үлэтигэр туһаайыллыбыт улуус баһылыгын кустовой сүбэ мунньаҕа ыытылынна.
Елена ПОТОЦКАЯ, «Саха сирэ» хаһыат, edersaas.ru
Хаартыска — улуустааҕы дьаһалта инстаграмыттан.