Уһук Илиҥҥи гектар Ньурба оройуонун урбаанньытыгар бэйэтин дьарыгын арыйарыгар көмөлөстө, диэн СИА-ҕа өрөспүүбүлүкэ баайга-дуолга министиэристибэтэ иһитиннэрдэ.
“Бэйэм дьыалабын арыйыахпын баҕарбытым, маныаха “Уһук Илиҥҥи гектар” бырайыакпын олоххо киллэрэрбэр төһүү буолла. Сири ылыы судургу буолбута абыраата”, — диэн Антоновка сэлиэнньэтигэр олорор урбаанньыт Павел Потапов эттэ.
Кини Антоновкаҕа суол айаҕар автосервис көрүҥнээх дьоҕус биисинэһи олоххо киллэриитин 2019 сылга түмүктээбитэ.
“”Гектары ылан баран, сыл буолаат, бу сир учаастагын хайдах туһанары быһаарыахтааххын, онтон үс сыл кэнниттэн үс ый устата сириҥ учаастагын хайдах туһанарыҥ туһунан декларация түһэрэҕин. Онтон биэс сылынан маны бас билиигэр ылыаххын эбэтэр уһун болдьохтоох арендаҕа уларсыаххан син”, — диэн кини салгыы кэпсээтэ.
Потапов “Уһук Илиҥҥи гектары” ылыыга сайабылыанньатын 2017 сыллаахха http://надальнийвосток.рф саайт нөҥүө биэрбит.
Быйыл күһүн урбаанньыт “Уһук Илиҥҥи гектар” бырагыраама уонна “Уһук Илиҥҥи ипэтиэкэ” бырагыраама кыттыылаахтарын кытта Благовещенскайга пуорумҥа кыттыбыт. Манна бырабыыталыстыба бэрэссэдээтэлэ Мишустин салалтатынан эрдэ ылбыт гектарын ситиһиилээхтик туһаммыт киһиэхэ эбии сир иэнин биэрэр туһунан этиллибитэ.
Эбии “гектарынан” биирдэ эрэ туһаныахха сөп. Маныаха сайабылыанньаны 1 киһи биэрэр уонна биир гектары аһарбат ханнык баҕарар иэннээх сири ылыан сөп. Эбэтэр хас да киһи бөлөҕө биэрэр буоллаҕына, 10 гектарга диэри иэннээх сиргэ кэлэктиибинэн сайаапка толоруохтарын сөп. Ол эрээри биир киһиэхэ 1 гектартан ордук тиксиэ суохтаах. Маны барытын НаДальнийВосток.РФ. саайтыгар сайабылыанньа биэрэн ылыаххытын сөп. Сайабылыанньаны көрүү орто болдьоҕо 35 күнтэн ордубат.
СИА.
Бэлэмнээтэ Женни Стрюкова
Хаартыска: тустаах саайтан