Ньурба улууһугар сылгыһыттары үөрэтэр киин арылынна.
Бүгүн, өрөспүүбүлүкэтээҕи “Сылгыһыт күнүгэр”, Ньурба улууһун Чаппанда сэлиэнньэтигэр биир үөрүүлээх түгэн тосхойдо. Ол курдук, сылгыны иитиигэ каадырдары бэлэмнээн таһаарыыга, үөрэтиигэ, идэлэрин таһымын үрдэтиигэ аналлаах үөрэтэр киин арылынна.
СӨ Тыа хаһаайыстыбатын министиэристибэтэ иһитиннэрэринэн, эбийиэк “Чаппанда” кэпэрэтиип баазатыгар тутуллубут. Бу сылгыны үөрдээн иитиини сайыннарыыга туһуламмыт миэрэлэр тустарынан өрөспүүбүлүкэ Ил Дарханын ыйааҕынан тэриллибит үһүс үөрэтэр киининэн буолуоҕа. Маннык кииннэр Хаҥалас уонна Өймөкөөн оройуоннарыгар аһыллыбыттара.
“Бүгүн биһиги өрөспүүбүлүкэҕэ бу үһүс киини арыйабыт. Манна сылгыһыттар эрэ буолбакка, тыа хаһаайыстыбатын атын исписэлиистэрэ эмиэ идэлэрин үрдэтиэхтэрэ. Ону тэҥэ аграрнай үөрэх тэрилтэлэрин устудьуоннара производственнай быраактыкаларын барыахтара. Сүөһү иитиитигэр бу киин бастыҥ уопут оскуолатынан, тыа хаһаайыстыбатын исписэлиистэригэр наука былаһааккатынан уонна аграрнай идэтийбит үөрэхтээһиҥҥэ каадырдары бэлэмнээн таһаарыыга бастыҥ үөрэтэр сиринэн буолуоҕа”, — диэн эрэнэрин биллэрдэ өрөспүүбүлүкэ тыа хаһаайыстыбатын миниистирэ Александр Атласов.
Манна анал үөрэтэр аудиториялаах, остолобуойдаах, истээччилэри олордор сирдээх. Арктикатааҕы ГАТУ, Дьокуускайдааҕы ТХТ преподавателлэрэ, М.Г.Сафронов аатынан Саха сиринээҕи ТХНЧИ исписэлиистэрэ уонна “АПК ресурсанан хааччыйыыга киинэ” тэрилтэ уонна оройуоннааҕы үөрэх управлениета үөрэтиэхтэрэ.
Сыллата бу үөрэх кииннэригэр идэтийбит үөрэҕи 200 тахса киһи ааһар. Кинилэргэ “Коневод-табунщик 3 разряда” сибидиэтэлистибэ туттарыллар.
Сахагов
Бэлэмнээтэ Женни Стрюкова
Хаартыска: тустаах саайтан