“Саха Өрөспүүбүлүкэтигэр сылгыны үөрдээн иитиини сайыннарар миэрэлэр тустарынан” СӨ Ил Дарханын 2016 с. ыйааҕар олоҕуран, бу күнү аан бастаан 2017 с. бэлиэтээбиппит.
2018 с. — Нам улууһугар, 2019 с. – Үөһээ Бүлүү улууһугар ыытыллыбыттара. 2020 с. Мэҥэ Хаҥалас улууһугар бу бэлиэ күнү Социалистическай Үлэ Дьоруойа А.Е.Степанов 100 сылын туолуутугар анаан ыытарга быһаарбыттара, хамсыгынан сибээстээн тохтотуллубута. 2021 с. Чурапчы улууһугар Социалистическай Үлэ Дьоруойа Роман Константинов 125 сылынан “Сылгыһыт күнэ” тэриллибитэ. Быйыл кулун тутар 21-22 күннэригэр Ньурба улууһугар өрөспүүбүлүкэтээҕи Сылгыһыт күнүгэр анаммыт тэрээһиннэр ыытыллаллар. Ол курдук, Чаппандаҕа сылгыһыттары үөрэтэр үөрэх киинэ арыллыаҕа.
“Чаппанда” кэпэрэтиип иһинэн сылгыһыттары уонна тыа хаһаайыстыбатын исписэлиистэрин анаан үөрэтэр киини арыйыы “Саха Өрөспүүбүлүкэтигэр сылгыны үөрдээн иитиини сайыннарар миэрэлэр тустарынан” СӨ Ил Дарханын 2016 с. ыйааҕар олоҕуран тутуллубута. Маннык кииннэр Өймөкөөҥҥо Томторго уонна Хаҥалас улууһун “Бөртө” сылгы собуотун иһинэн аһыллыбыттара. Өрөспүүбүлүкэ тыа хаһаайыстыбатын миниистирэ Александр Атласов бэлиэтииринэн, бу үөрэх киинигэр сылгыһыттар эрэ буолбакка, тыа хаһаайыстыбатын исписэлиистэрэ эмиэ билиилэрин хаҥатыахтара, аграрнай үөрэх устудьуоннара быраактыканы ааһыахтара. Сыллата бу аһыллыбыт кииннэргэ 200-тэн тахса киһи анал үөрэтиини барыаҕа. Бүгүн сылгыны үөрдээн иитии боппуруостарыгар сүбэ мунньах буолуоҕа. Тыа хаһаайыстыбатын бородууксуйатын быыстапка-дьаарбаҥката, племенной сылгылары атыылааһын тэриллиэҕэ.
Сарсын саха боруода уонна булкаас аттар сүүрүүлэрэ буолуохтаах. Антоновкаҕа “Сылгыһыт күрэҕэ” көрөөччүлэри түмүөҕэ. Бу тэрээһиннэри Саха сирин Тыа хаһаайыстыбатын министиэристибэтэ, Ньурба улууһун дьаһалтата уонна “Сахаагроплем” тэрилтэ тэрийэллэр.
Өрөспүүбүлүкэ тыа хаһаайыстыбатын министиэристибэтэ сылгы баазаларын тутууга ороскуот сорох чааһын толуйууга субсидияны ылааччылары сүүмэрдээтэ.
Онон Тыа хаһаайыстыбатын министиэристибэтин хамыыһыйата докумуоннары көрөн баран, 18 тыа хаһаайыстыбатын табаары оҥорооччутугар эт буолар сылгыны үөрдээн иитиини сайыннарыыга тахсар ороскуот сорох чааһын үбүнэн хааччыйыыга субсидиялары биэрэргэ быһаарбыта. Судаарыстыба өйөбүлүн 9 бааһынай-пиэрмэр хаһаайыстыбата, 2 урбаанньыт, 2 тыа хаһаайыстыбатын кэпэрэтиибэ, 3 хааччахтаммыт эппиэтинэстээх уопсастыба уонна 2 производственнай кэпэрэтиип ылар буоллулар.
“Уопсайынан, быйыл Саха сиригэр сылгыны үөрдээн иитиини сайыннарыыга 55 мөлүйүөн солкуобай көрүллүбүтэ. Онон хамыыһыйа көрүүтүгэр-быһаарыытыгар 20 улуустан уонна Дьокуускай куораттан 82 сайаапка түспүтэ. Балартан сүүмэрдээһини 18 хаһаайыстыба ааспытын туһунан иһитиннэрэбит. Хотугу улуустартан Дьааҥы, Томпо улуустара бааллар. Сайаапкалары олохтоммут киритиэрийдэринэн көрдүбүт. Холобурдаан эттэххэ, субсидияны ылааччылар ортолоругар бастыҥ племенной хаһаайыстыбалар бааллар . Ол курдук, “Победа” ХЭТ (Таатта), Мэкэри” ХЭТ (Уус Алдан) уонна “Арыылаах” ПК (Дьааҥы)”, — диэн тыа хаһаайыстыбатын миниистирин солбуйааччы Николай Афанасьев эттэ.
Онон сылгы баазаларын тутууга сэртипикээттэри Ньурба улууһугар ыытыллар “Сылгыһыт күнүгэр” үөрүүлээх быһыыга-майгыга туттарыахтара.
СӨ Тыа хаһаайыстыбатын министиэристибэтин пресс-сулууспата
Бэлэмнээтэ Женни Стрюкова
Хаартыска Сахаговтан ылылынна