Бу күннэргэ Ньурба улууһун дьаһалтатын экспертнай хамыыһыйата Хаҥалас, Үөдэй, Маар нэһилиэктэригэр сылдьан, оройуоҥҥа биллэриллибит Норуот көҕүлээһинин сылыгар анаммыт олохтоохтор бырайыактарын кытта билистэ.
Бу туһунан Үөдэй нэһилиэгин баһылыга Мария Николаева иһитиннэрдэ:
— Хаҥалас нэһилиэгиттэн — 10, Үөдэй нэһилиэгиттэн — 5 уонна Маар нэһилиэгин олохтоохторун 10 бырайыага дьүүлгэ турда.
Тыа хаһаайыстыбатын салаатыгар Руслан Григорьев сүөһү ахсаанын элбэтиигэ санаатын үллэһиннэ. Николай Андреев социальнай хантарааҕынан былырыын тимир турбанан мангал арааһын оҥорон атыылаан, онтун быйыл кэҥэтэр санаалааҕын иһитиннэрдэ.
Аркадий Григорьев пилораманы үлэлэтэн дьоҥҥо мас бэлэмнээн атыылыыр былааннаах. Кини пилораматыгар бэс эрбээн киллэрэн сытыарарын туһунан эттэ.
Хамыыһыйа бырайыактары кытта билсэн баран, нэһилиэктэргэ биирдии кураторы анаата.
Бырайыактар үлэҕэ киирдэхтэринэ, хас биирдии киһи бэйэтин тус дьыалатын сайыннарар кыахтаныаҕа.
Елена ПОТОЦКАЯ, «Саха сирэ» хаһыат.
Хаартыска — Мария Николаева тиксэриитэ.