Коронавирус инфекцията өрөспүүбүлүкэҕэ тарҕамматыгар аналлаах Ил Дархан Айсен Николаев кулун тутар 30 күнүнээҕи ыйааҕар олоҕуран, Ньурба улууһун баһылыга Алексей Иннокентьев кулун тутар 30 күнүнээҕи 455 нүөмэрдээх ыйааҕар эбии уларытыылары киллэрдэ.
Бу туһунан улуус дьаһалтатын пресс-киинэ иһитиннэрэр. Ол курдук маҕаһыыннарга, аптекаларга уочараттыыр дьон икки ардыларыгар 1,5 миэтэрэ тэйиччи дистанцияҕа олоҕурбут анал бэлиэ ирдэнэр буолла. Бу ирдэбили бары маҕаһыыннар, үлэлии турар тэрилтэлэр булгуччу тутуһуохтаахтара ыйылынна. Ону таһынан уочарат үөскээбэт усулуобуйата оҥоһуллуохтааҕа тоһоҕолоон бэлиэтэннэ.
Улуус баһылыгын анал ыйааҕынан урбаанньыттары өйүүр киин чилиэннэрэ буолар орто уонна дьоҕус урбаанньыттар ыйдааҕы аренда төлөбүрүттэн босхолоннулар.
Кулун тутар 31 күнүттэн муус устар 6 күнүгэр диэри улуус үрдүнэн арыгы атыылааһына бобулунна. Эмиэ кулун тутар 31 күнүттэн куораттар икки ардыларыгар сүүрэр таксилар тохтотулуннулар.
Сыстыганнаах коронавирус ыарыыны утары ыытыллар үлэни тэрийэр анал ыстаапка ыйытыылаах улуус олохтоохторо 8 (41134 ) 2-25-16 нүөмэргэ эрийэн билсэргитигэр ыҥырабыт.
Ньургуйаана Иванова, “Саха сирэ” хаһыат, edersaas.ru
Хаартыска: интэриниэттэн