Кулун тутар 21 күнүгэр Ньурбатааҕы судаарыстыбаннай көһө сылдьар тыйаатыр «Шинель» испэктээги «Желанный берег» бэстибээл чэрчитинэн туруорда.
Надежда ЕГОРОВА, «Саха сирэ» хаһыат, edersaas.ru
Нуучча литэрэтиирэтин классиктарыттан биирдэстэрэ Николай Гоголь «Шинель» сэһэнэ Арассыыйа элбэх тыйаатырыгар араас хабааннаахтык туруоруллан кэллэ. Онтон үгүс сылларга «стандартка эппиэттээбэт» стилинэн уонна хайысханан үлэлээн кэлбит Ньурба тыйаатыра бу да сырыыга «Шинели» барыларыттан уратытык, сахалыы толкуйу киллэрэн туруорбута улахан интэриэһи тарта.
Испэктээккэ тыйаатыр эдэр уонна орто көлүөнэ артыыстара Петр Винокуров, Людмила Васильева, Венера Никитина, Леонид Анисимов, Надежда Афанасьева, Антонина Анисимова оонньоотулар. Уус-уран салайааччы-дириэктэр, СӨ искусство үтүөлээх диэйэтэлэ Юрий Макаров «Шинельгэ» киһи историятын төрүөҕүттэн бүтүөр диэри көрдөрдө.
Сцена кэмчи декорациялаах, баар да буоллаҕына, хара өҥ баһыйар. Сүрүн дьоруой «Акаааакыыыый» үс хайаҕастаах мас дуоскаттан турар кырачаан дьиэҕэ маарынныырга олорор. Ол хайаҕаһынан бу олоххо туох буола турарын одуулуур. Кинини эмиэ да 90-с сыллардааҕы Шансон дискотеката, эмиэ да Доги вальса, эмиэ да Аве Мария ырыалара аймыыллар. Кыра өйдөөх киһи, түлэй-балай барыах айылааҕа. Ол да буоллар, кини бүгүҥҥү күн туһунан толкуйдуу сатыыр.
Ол эрээри.. Атын киһи олоҕун улахаҥҥа уурбат, кини олоҕунан оонньуур көстөр уонна көстүбэт күүстэртэн соҕотох киһи көмүскэнэр кыаҕа суоҕа итэҕэтиилээхтик дьүһүйүллэр. Испэктээк тухары дьоннор уонна мааскалар түлэй-балай тыллаһан тахсаллар. «Саха Акакий Акакиевиһа» оҕолуу итэҕэйимтиэтэ уонна киитэрэй буоларга күһэллиитэ көрөөччүнү ардыгар сонньутар, ардыгар харааһыннарар. Сүрүн дьоруой: «Миигин тоҕо бары атаҕастыылларый?» – диэн бэйэтэ бэйэтиттэн ыйытар. Маннык атаҕастабыллаах олохтон быыһанар суолу кини өлүүгэ эрэ көрөр…
ЫСПЫРААПКА:
Ньурбаҕа ыытыллыбыт «Сата» өрөспүүбүлүкэтээҕи бэстибээлгэ сүрүн оруолу — Акакий Башмачкины оонньообут СӨ култуура туйгуна Петр Винокуров – «Эр киһи бастыҥ оруола», Ийэ-хаһаайка оруолун иһин Людмила Васильева «Иккис былааннаах дьахтар оруола» номинациялары, тыйаатыр худуоһунньуга Айыына Сергеева бастыҥ сценография иһин бэстибээл дьүүллүүр сүбэтин анал бирииһин ылбыттара.
Ньурба тыйаатыра бу испэктээгинэн соторутааҕыта Москваҕа 23-с «Кыһыл көмүс мааска» бэстибээл «Маска Плюс» диэн куонкурус таһынааҕы бырагырааматыгар ситиһиилээхтик кыттан кэллэ.
Кириитиктэр уонна экспертэр ураты суоллаах режиссер Юрий Макаров этническэй театральнай култуура биир сонун хайысхатын талбытын биһирээтилэр. Испэктээккэ саха омугун төрүт матыыптарын сатабыллаахтык туһанан, тыйаатыр эйгэтигэр аныгы хайысханы киллэрбитин, музыкальнай композиция интэриэһинэйдик талыллыбытын ыйдылар.
Надежда ЕГОРОВА, «Саха сирэ» хаһыат, edersaas.ru