Бу ыйга Ньурба тыйаатырын сыанатыгар Николай Неустроев «Тиэтэйбит» айымньытын СӨ култууратын туйгуна, режиссер Алгыс Макаров туруорда. Сценографияҕа Туйаара Львова, көстүүмнэргэ Камилла Лебедева үлэлээбиттэрэ. Кэмиэдьийэ сүрэхтэниитин көрөөччү уруйдуу-айхаллыы көрбүтэ, дьон олус сөбүлээбитэ.
Испэктээк сүрүн дьоруойун Уйбааны толорбут артыыс Роман Семенов бэйэтин санаатын маннык үллэстэр: «Саха классик суруйааччыта Николай Денисович Неустроев аатырбыт кэмиэдьийэтигэр сүрүн оруолу толорор олус долгутуулаах уонна эппиэтинэстээх этэ. Режиссер Алгыс Макаров итэҕэйэн сүрүн оруолга ылбытыгар, Уйбаан оруолун арыйарбар көмөлөспүт кэллиэгэлэрбэр махтанабын. Ньурба тыйаатырыгар саҥа испэктээк сүрэхтэммитинэн истиҥник эҕэрдэлиибин!».
Ааспыт субуотаҕа «Тиэтэйбит» кэмиэдьийэни ыаллыы сытар Сунтаар улууһун Түбэй Дьаархан нэһилиэгиттэн Ньурба тыйаатырын төрүттэспит артыыстартан биирдэстэрэ, Москватааҕы Щепкин аатынан Үрдүкү театральнай училищены 1966 сыллаахха бүтэрбит СӨ култууратын үтүөлээх үлэһитэ, «Гражданскай килбиэн» бэлиэ хаһаайына, Ньурба, Сунтаар улуустарын Бочуоттаах олохтооҕо, СӨ култууратын бочуоттаах үлэһитэ Фрументий Петрович Сафронов, кини кэргэнэ, Ньурба тыйаатырыгар артыыһынан үлэлии сылдьыбыт, СӨ култууратын үтүөлээх үлэһитэ, «Гражданскай килбиэн» бэлиэ хаһаайына Нина Ильинична Потапова уонна уоллара Фрументий Фрументьевич Сафронов кэлэн көрдүлэр.
Испэктээк кэнниттэн ыалдьыттар санааларын тиэртилэр. Фрументий Сафронов: «Кэмиэдьийэни олус сөбүлээтим. Режиссер Алгыс Макаров үлэтэ туспа буочардаах эбит, чахчы, күлүүлээх түгэннэрэ элбэхтэр. Кинигэни ааҕа олорон ол саҕанааҕы дьоруойдар оруобуна сөп түбэһэн айымньы иһиттэн тахсан кэлбиттэрин курдук көрдүм. Уобарастар көрөөччүгэ тиийимтиэлэр. Сүрүн дьоруойу оонньообут Роман Семенов, Надежда Афанасьева, Сардаана Михайлова, Артур Евсеев уонна бары кыттыбыт артыыстар уобарастарын толору арыйдылар. Барыгытыгар ситиһиилэри баҕарабын!» — диэн санаатын үллэһиннэ.
Нина Потапова Ньурба тыйаатырын кэлэктиибигэр ыҥырыыларын иһин махтанна. Венера Никитина, Анисья Колесова толорууларын, Түбэй Дьаархаҥҥа үлэлии сылдьыбыт Артур Евсеев итэҕэтиилээхтик оонньообутун бэлиэтээтэ. «Элбэхтэ гостуруоллааҥ, көрөөччү сөбүлүөҕэ дии саныыбын», — диэн түмүктээтэ.
Ити курдук ыраах айаны аахсыбакка Сафроновтар дьиэ кэргэнинэн кэлэн ыалдьыттаан, санааларын үллэстэн бапбыттара тыйаатырга биир суолталаах түгэн буолла.