Саха АССР төрүттэммитэ 100 сылыгар Ньурба улууһугар биир өр күүппүт долгутуулаах түгэннэрэ үүнүөҕэ.
2022 сыл cайын Ньурбатааҕы судаарыстыбаннай көһө сылдьар дыраама тыйаатырын саҥа дьиэтэ үлэҕэ киириэҕэ. Саҥа эбийиэк «Култуура» национальнай бырайыак чэрчитинэн тутуллар. Ону таһынан быйыл сайын өрөспүүбүлүкэ баһылыга Айсен Николаев биэрбит сорудаҕынан, тыйаатыр таһынааҕы былаһаакка тупсаҕайдык оҥоһуллуоҕа.
Ньурба тыйаатыра 1966 сыллаахха тэриллиэҕиттэн биир мэндиэмэннээх эргэ мас дьиэҕэ үлэлээн кэллэ. Онон, тыйаатыр саҥа дьиэлэниитэ артыыстарга уонна көрөөччүлэргэ улахан үөрүүлээх уонна долгутуулаах түгэнинэн буолара саарбахтаммат.
Билигин дьиэ 60% бэлэм, тутааччылар дьиэ ис эркинин тупсараллар сылаас киирэр систиэмэтин таҥаллар, витражтары оҥороллор уо.д.а.
Ньурба тыйаатырыгар М.Щепкин аатынан училищены, Ускуустуба Уһук Илиҥҥи институтун, Свердловскайдааҕы тыйаатыр институтун итиэннэ Култуура уонна ускуустуба Арктикатааҕы институтун бүтэрбиттэр айа-тута сылдьаллар. 56 сыл устата тыйаатыр кэлэктиибэ өрөспүүбүлүкэҕэ эрэ буолбакка, Арассыыйаҕа, Уһук Илиҥҥэ, Арассыыйа тас өттүгэр араас бэстибээллэргэ, көрүүлэргэ кыттан, кыайыы көтөллөөх кэлэр, артыыстар тыйаатырдарын аатын үрдүктүк туталлар.
ЫСПЫРААПКА:
1966 сыллаахха иккистээн аһыллыбыт тыйаатырга Москкватааҕы Щепкин аатынан училищены бүтэрбиттэр кэлбиттэрэ. Валентина Николаева, Петр Николаев, Анатолий Кривогорницын, Владимир Семенов, Маргарита Тихонова, Фрументий Софронов, Василий Фомин, Зоя Багынанова, Симон Федотов, Тимофей Сметанин, Мария Николаева, Прасковья Адамова, Степан Емельянов, Николай Попов, Геннадий Сивцев, Люция Романова уоннаНиколай Барашков тыйаатыр устуоруйатыгар көмүс буукубанан суруллуннулар. Дириэктэрдэринэн Александр Алексеевич Габышев анаммыта.
Тыйаатыр быыһа Щепкини бүтэрбиттэр дипломнай испэктээктэринэн -– «Поднятая целина» испэктээгинэн аһыллыбыта. Быйыл 55 сылын бэлиэтээбит тыйаатырга араас кэмҥэ Николай Федорович Григорьев, Иван Еремеевич Иванов, Владимир Егорович Адамов дириэктэрдээбиттэрэ. Көрөөччүлэр режиссердар Спартак Петрович Федотов, Василий Михайлович Фомин, Спартак Иванович Слепцов, Александр Васильевич Титигиров туруорбут үлэлэрин күн бүгүҥҥэ диэри умнубаттар.
Билигин тыйаатыр режиссерунан, ураты көрүүлээх, СӨ ускуустубатын үтүөлээх диэйэтэлэ Юрий Макаров үлэлиир.
Надежда ЕГОРОВА, «Саха сирэ», edersaas.ru