Ньурба тыйаатыра болдьоҕор тутуллуо

Бөлөххө киир:

Бүгүн Айсен Николаев Ньурба улууһугар үлэлиир. Кини Ньурбатааҕы көһө сылдьар судаарыстыбаннай драматическай тыйаатыр дьиэтин тутуу хаамыытын көрдө-иһиттэ.

Бүгүн улуус социальнай-экэнэмиичэскэй сайдыытын кытары билистибит. Ньурба улууһа өрөспүүбүлүкэҕэ биир саамай сайдыылаах улуус буолар. Манна бырамыысыланнас эмиэ сайдыбыт. Улахан социальнай эбийиэктэр тутулла тураллара үөрдэр. Тыйаатыр саҥа дьиэтэ бары ирдэбиллэргэ эппиэттиир. Онон дойду кыра куораттарыгар биир саамай бастыҥ тыйаатыр дьиэтэ буолуоҕа. Сотору кэминэн тутуу түмүктэнэн, тыйаатыр саҥа сезонун саҥа дьиэҕэ көрсүө диэн эрэнэбин, — диэн кини эттэ.

Тыйаатыр дьиэтин тутуу 2019 сылтан “Култуура” национальнай бырайыак “Култуурунай эйгэ” федеральнай бырайыагын чэрчитинэн саҕаламмыта.

Билигин тутуу түмүктэнэн эрэр. Дьиэ тас сабыытын бүтэрдилэр. Тыйаатыр сыанатын оҥороллор, анал тэриллэри, уотун-күөһүн холбууллар, тиэргэнин тупсараллар. Былаан быһыытынан, сэтинньи ыйга тутуллан киириэхтээх. Билигин 55 киһи үлэлии-хамсыы сылдьар. Тутууну «РДР Групп» хампаанньа ыытар, эбийиэккэ 540 мөлүйүөн солкуобай көрүллүбүтэ.

Тыйаатыр эргэ мас дьиэтэ 1966 сылга Амакинскай экспедицията туппут кулуубугар баара. Оттон саҥа уораҕайга артыыстар айар үлэлэригэр усулуобуйа барыта баар – 240 миэстэлээх көрөөччү саалата, аччыгый уонна эрэпэтииссийэлиир саалалар, гримеркалар…

Быйыл “Култуура” национальнай бырайыагынан 10 оҕо ускуустубатын киинэ, 6 култуура дьиэтэ хапытаалынай өрөмүөн ыытыллар. Манна федеральнай уонна эрэгийиэннээҕи бүддьүөттэртэн 100 мөлүйүөн солкуобай көрүллүбүтэ.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru.

+1
0
+1
0
+1
0
+1
0
+1
0
+1
0
+1
0