Сүрүн Уопсастыба

Ньурба олохтооҕо атах таҥаһын тигэр

2022 сыл олунньутугар Ньурба улууһун баһылыга Алексей Иннокентьев көҕүлээһининэн Ньурбаҕа “Норуот көҕүлээһинин сыла” биллэриллибитэ. Сонно тута эспиэрдэр хамыыһыйалара тэриллэн оройуон нэһилиэктэригэр тахсан дьонтон сайаапкалары тутан, үлэлээн барбыттара. Киров олохтооҕо Денис Иванов атах таҥаһын тигэн, бэйэ дьыалатын саҕалаабыт.

Ол туһунан Денис Иванов маннык кэпсиир:

— Бэйэм дьыалабын арыйар толкуйга кэлэн баран, “тугунан дьарыктанабын?” диэн бэрт өр сыымайдаабытым. Дьиҥэр, илии үлэтиттэн оҕо сааспыттан чаҕыйбаппын, син ону-маны сатыыбын. Дьиэ тутуутун, муос-тан оҥоһуктары кыһар туһунан санаа баара. Онтон кыра эрдэхпинэ ийэбэр унтуу улларарыгар көмөлөһөрбүтүн санаан, атах таҥаһын тигэргэ санаммытым. Кыра сылдьан билэҕэ оҕуруо тиһэр, уллуҥаҕы быһар этибит, ийэбитигэр илии-атах буолан. Онон кулун тутарга “самозанятай” буолбутум уонна социальнайдартан көмө көрдөөбүтүм. 250 тыһыынча көрбүттэрэ, онон тириинэн дьарыгыран барбытым. Ити кэмҥэ Ньурбаҕа “Көҕүлээһин сыла” биллэриллэн манна, Мархаҕа хамыыһыйа кэлбитигэр бырайыакпын көмүскээбитим. Ситиһиилээхтик көмүскээн, 255 тыһыынча грант туппутум, онон атах таҥаһын тигэр массыналары куораттан атыыластым.
Билигин наар эр дьон атаҕын таҥаһын тигэбин, дьон бэйэлэрин атахтарын мээрэйинэн тигиллибит үйэлээх саппыкыларбын астына кэтэр буоллулар. Бэйэ бэйэлэриттэн истиһэн кэлэллэр. Соторутааҕыта дьахтар атаҕар колодкалары атыыластым, холонуохпун баҕарабын. Биллэн турар, кэрэ аҥаардар быдан бириинчик сакаасчыт буолалларын өйдүүбүн, бу сайдыым саҥа таһыма буолуоҕа. Уопсайынан, хаачыстыбаны сөбүлүүр дьон мин оҥоһукпун атыылаһар, дьиҥэр, маҕаһыынтан удамыр сыанаҕа биир-икки сыл кэтиллиэн сөптөөх атах таҥаһын холкутук атыылаһыахха сөп буоллаҕа. Оттон мин бэйэ мээрэйинэн оҥоһуллар үйэлээх таҥаһы тигэбин.

Араас көрүҥү элбэтэ сатыыбын, унтуу, саппыкы, бачыыҥка тигэбин, эппитим курдук, дьахтар саппыкытын оҥоруом. Сайыҥҥы ыһыахха саары этэрбэстэри тигэр санаалаах этим, быйыл сатаммата, ол эрэн, былааҥҥа баар. Өссө үөрэниэм этэ, соҕуруу баран. Төһөнөн үлэлиигин да, оччонон саҥаны, уустугу оҥорорго баҕа санаа улаатан иһэр эбит. Улуус дьиҥнээх өйөбүлү биэрэн, бэрт түргэнник бигэ тирэх булан атахпар турдум.

Егор Карпов.

0
1
Telegram @edersaas20